འོད་དཀར་དྲ་ཚིགས།

སྦྲ་རིགས་པ་ཐོགས་མེད། 

ཆེ་ཚུགས་སྦམ་རྫུ་བྲལ་བའི་འབྲོག་གཤིས་དང་།།

གསལ་དག་སྙན་གསུམ་འཛོམས་པའི་གླུ་སྐད་ཀྱིས།།

མཐོ་སྒང་སྒྱུ་རྩལ་གསོན་པོར་སྐྲུན་མཁན་ཁྱེད།།

རྒྱུད་དྲུག་པི་ལྦང་བཞག་ནས་གང་དུ་ཕེབས།།

འབྲོག་པའི་རྩྭ་ཐང་རོང་པའི་ཞིང་ཁ་དང་།།

དགོན་པའི་ཆོས་ར་སློབ་གྲྭའི་འཛིན་ཁང་སོགས།།

གླུ་སྐད་ཁྲོད་ནས་གཅིག་ཏུ་སྦྲེལ་མཁན་ཞིག།


ཁྱེད་ཉིད་མ་གཏོགས་བོད་ན་མེད་ཅེས་ཐོས།།

ཁྱེད་ཀྱི་དབྱངས་རྟ་རྐུ་མཁན་གླུ་བ་དང་།།

ཁྱེད་ཀྱི་མཚན་ཉན་བཀོལ་མཁན་མཁན་སྤྲུལ་སོགས།།

ཁྱེད་ལ་བརྟེན་ནས་མཚན་སྙན་རྒྱས་མཁན་མང་།།

ཁྱེད་ཀྱི་ངག་འདི་དགོས་འདོད་ཀུན་འབྱུང་འདྲ།།

ང་ཚོ་ཁྱེད་ཀྱི་གླུ་སྐད་ཁྲོད་ནས་སྐྱེས།།


ང་ཚོ་ཁྱེད་ཀྱི་གླུ་སྐད་ཁྲོད་ནས་དར།།


ཁྱེད་ཀྱི་གླུ་སྐད་ང་ཚོའི་ལང་ཚོ་ཡིན།།

ལང་ཚོ་འདི་ལས་ང་ཚོས་ཁྱེད་ཉིད་རྙེད།།

གཞིས་ཀྱི་སྡུག་བསྔལ་ཁྱེད་ཀྱི་གླུ་ཡིས་གླེང་།།

བྱེས་ཀྱི་དྲན་གདུང་ཁྱེད་ཀྱི་གླུ་ཡིས་གསོས།།

རི་ཆུ་སྟོང་གིས་ཆོད་པའི་གཞིས་བྱེས་གཉིས།།

འདི་ལྟར་ཁྱེད་ཀྱི་གླུ་སྐད་ཁྲོད་ནས་འཛོམས།།

བོད་ཀྱི་དེང་རབས་སྒྱུ་རྩལ་གྱི་རྒྱལ་བོ་བདུད་བྷེ་ལགས་སྐུ་གཤེགས་པ་ཐོས་རྗེས་ནུབ་ཕྱོགས་ཀྱི་སློབ་གླིང་ག་གེ་མོ་ཞིག་ཏུ་ཤར་མར་བྲིས།

ངེད་དྲ་ཚིགས།