སྐད་འཕྲིན་ཀྱི་འཇིགས་སྣང་།


འོད་དཀར།

   ཧ་ཅང་ས་མཐའ་ས་མཐའ་ཞིག་སྟེ་ཅི་ཡང་མེད་པའི་གནས་དེ་ན།  ཁྱི་སྨྱོན་ལྟ་བུའི་སྐྱེ་བོ་འགས་ཉེ་འཁོར་ཀུན་ལ་མཆེ་གཙིགས་ཀྱིས་ངར་སྒྲ་སྒྲོག་བཞིན་པ་མཐོང་དུས། བྱམས་སེམས་དང་སྙིང་རྗེའི་བདག་ཉིད་ལ་གནས་པའི་མི་རིགས་འདི་གང་ཞིག་ལ་བོར་ཨེ་འགྲོ་སྙམ་པའི་བློ་འཚབ་ཡང་ཡང་འཁོར་ཡོང་།

   ཕ་ལོ་སྤྲེའུ་བྱང་ཆུབ་སེམས་དཔའི་གཤིས་སྤྱོད་བཟང་པོ་དེ་དང་ཡབ་མེས་བཙན་པོ་དག་གི་ངང་རྒྱུད་འཇམ་པོ།  ད་དུང་དགེ་བཅུའི་ལས་ལ་གོམས་ཤིང་དུང་བའི་གདོང་དམར་བའི་མི་རིགས་འདི།  ང་ཚོའི་མི་རབས་འདིས་འདི་ལྟར་དུར་འོག་ལ་འཇུག་བཞིན་པ་མཐོང་དུས། སྙིང་གི་འཕར་རྩ་རེ་རེ་བྲང་གཞུང་ནས་བཀོག་སོང་།

    དེང་གི་སྐད་འཕྲིན་ཟེར་བའི་བརྡ་འཕྲིན་གྱི་དཀྱིལ་འཁོར་རྫོད་པོ་འདི་ནས།  ང་ཚོའི་མི་རབས་འདི་ལ་བདེན་པ་མི་དགོས་ལ། དྲང་གཏམ་དང་ཡ་རབས་ཀྱི་ལུགས་སྲོལ་དེ་ལས་དབེན།  བཟང་སྤྱོད་དང་གོང་བཀུར་སོགས་ཀྱི་ཐ་སྙད་ཡོད་ཚད་གནས་འདི་ནས་བྲིས་ཟིན་པའི་གསེར་གྱི་འགྱུར་རྡོ་རེ་རེར་གྱུར།

   ཚོགས་པ་མང་པོ་དང་སྟོང་བཤད་རེ་རེ་ཡི་བར་གསེང་ན།  དུས་ཚོད་དང་མི་ཚེ་སྟོང་ཟད་བྱེད་བཞིན་པའི་སྐར་ཆ་རེ་རེ་ཇི་འདྲའི་འཇིགས། ད་ནི་ཞི་བདེ་བག་ཕེབས་ལ་གནས་པའི་མི་རིགས་ཤིག་འདི་ལྟར་ཟང་ཟིང་ལ་བསྒྱུར་སོང་།

   རྫུན་དང་ཕྲ་མ། གཡོ་སྒྱུ་ཁྲམ་གསུམ་གྱི་བྱ་སྤྱོད་ནི་འདི་དག་གི་འཚོལ་སྙེག་ཡིན་ནམ།  དུས་དེ་རིང་སུ་ཞིག་རྫུན་ལ་མཁས་ན་དེ་ནི་མཁས་པ་ཡིན་ལ། སུ་ཞིག་ཕྲ་མར་བྱང་ན་དེ་ནི་དཔའ་བོར་རློམ། འདི་ལྟར་ཡོད་ཚད་ཀྱི་ཡོད་ཚད་མགོ་མཇུག་ལོག་སོང་བས།  ཁ་བ་གདོང་དམར་བའི་མི་རིགས་དེ་འདི་ལྟར་འགྱུར་དགོས་པ་ཡིན་ནམ།

    ཡབ་མེས་དག་གི་དཀའ་སྤྱད་ལས་གྲུབ་པའི་རིག་གནས་དང་གོམས་གཤིས་བཟང་པོ་དག  དེང་གི་སྐད་འཕྲིན་གྱི་དཀྱིལ་འཁོར་ནས་རླུང་ལ་སྐུར་བཞིན་འདུག

   མྱི་ལོ་ལྔ་བཅུའི་གཉའ་གནོན་ལས་འཇིག་མ་ཐུབ་པའི་བཙན་པོའི་སྙིང་སྟོབས།  དེང་གི་སྐད་འཕྲིན་གྱི་སྐུད་སྣེ་ན་འབོར་བཞིན་འདུག

   བདག་གི་ཡབ་མེས་ལགས།  ད་ནི་ངོ་མ་མི་རབས་འདི་འདི་ལྟར་འཇིག་དགོས་པ་རེད་དམ།
བདག་གི་སྟོན་པ་ལགས།  ད་ནི་དངོས་ནས་དུས་རབས་འདི་འདི་ལྟར་འགྱུར་ཟིན་པ་ཡིན་ནམ།
དཀོན་མཆོག་མཁྱཻན།

༢༠༡༦ ། ༠༣། ༠༣  དགོང་མོར་བྲིས།

རྩོམ་ཡིག་གི་བདག་དབང་ངེད་དྲ་ཚིགས་ལ་ཡོད་པས་གང་བྱུང་འཁྱེར་མི་ཆོག


མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s