ཞོགས་ལྗང་གི་གོང་གཏུག་ཡི་གེ

ཞོགས་ལྗང་།


མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་ལ།

        ཁོ་བོའི་མིང་ལ་འབྲུག་དཀར་རྒྱལ་ལམ་འབྲུག་ལོ་ཟེར་ཞིང་།  པིར་མིང་ལ་ཞོགས་ལྗང་ཟེར།  ཀན་སུའུ་ཞིང་ཆེན་ཀན་ལྷོ་ཁུལ་བསང་ཆུ་རྫོང་རྒན་གྱ་ཁུལ་ཚོ་ཁ་གྱ་སྡེ་བའི་མི་ཡིན།  ཕྱི་ལོ་༢༠༡༥ ལོའི་ཟླ་ ༣ པའི་ཚེས་༡༩ ཉིན་རེབ་གོང་རྫོང་སྤྱི་བདེ་ལས་ཁུངས་ཀྱི་འཛིན་བཟུང་བྱས་ཤིང་།   ཚེས་༢༠ ཉིན་གནས་དེའི་ལྟ་སྲུང་ཁང་དུ་བཀག་ཉར་བྱས།  ཕྱི་ལོ་ ༢༠༡༥ ལོའི་ཟལ་ ༥ པའི་ཚེས་ ༥ ཉིན་དངོས་སུའཛིན་བཟུང་གསལ་བརྡ་བསྒྲགས་འབྱོར་བྱུང་།  ཕྱི་ལོ་ ༢༠༡༥ ལོའི་ཟླ ༧ པའི་ ༢༡ ཉིན་རྨ་ལྷོ་ཁུལ་མི་དམངས་ཁྲིམས་ཁང་ནས་ཁྲིམས་ར་ཚོགས་ཤིང་།  ངས་རང་གི་བྱས་པ་ཁྲིམས་འགལ་མིན་པའི་དག་སེལ་བྱས་པ་བརྒྱུད།  ཁྲིམས་ཁང་གིས་གྲོས་སྡུར་ཕྱིར་སྣུར་ཟླ་ངོ་བདུན་ལྷག་བྱས་རྗེས།  ཕྱི་ལོ་ ༢༠༡༦ ལོའི་ཟླ་ ༢ པའི་ཚེས་ ༡༧ ཉིན་རྨ་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གིས་ཁྲིམས་ར་ཐེངས་གཉིས་པ་ཚོགས་ཏེ།  དུས་བཀག་བཙོན་འཇུག་ལོ་གསུམ་དང་།  ལོ་གཉིས་ལ་ཆབ་སྲིད་ཐོབ་ཐང་བླངས་པའི་ཐག་བཅད་ཁྱབ་བསྒྲགས་བྱས།  ད་རེས་ཀྱི་ཁྲིམས་བཅད་འཇུག་འབྲས་འདིར་ཁོ་བོ་མི་སྒེར་ནས་ངོས་ལེན་ཡེ་ནས་མེད་པས།  ཁྱེད་མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ལ་ཞུ་གཏུག་ཡི་གེ་འདི་བྲིས་ཏེ།  རྒྱུ་འབྲས་དྲང་གཞག་འོང་བའི་རེ་བ་སྙིང་ལ་བཅངས་ཡོད།

     རྨ་ལྷོ་ཁུལ་མི་དམངས་ཁྲིམས་ཁང་གིས་ངས་བྲིས་པའི་ནང་དོན་འདི་དག་གི་ཐད་ནས་རྒྱལ་ཁབ་ཁ་བྲལ་སྐུལ་སློང་བྱས་པའི་ཉེས་མིང་འདོགས་ཀྱིན་འདུག


          ༡༽ ཆོས་ལུགས་དད་མོས་རང་དབང་སྐོར་གྱི་དྲ་རྩོམ།  ༢༽ གསུམ་པའི་བཅུ་དྲུག་ཉིན།  ཉེན་རྟོག་པ་དང་དམག་མིས་ངའི་མགྲོན་ཁང་དུ་མེ་མདའ་བཙུགས་ནས་ང་ལ་དྲག་བཤེར་བྱས་པའི་གནས་ཚུལ་བྲིས་རྩོམ།  ༣༽ <<གནམ་ས་གོ་འབྱེད།>> ཀྱི་ཚན་པ་ཐུང་ཐུང་ཞིག་དྲ་ཐོག་ན་འཁྱར་གྱིན་པ་བརྒྱུད་བསྐུར་བྱས་པ། ༤༽ ཀྲུང་གོའི་སྲིད་གཞུང་གིས་བོད་རང་བཙན་དང་མ་འབྲེལ་གནད་དོན་སྐོར་ལ་གོང་ས་མཆོག་དང་གྲོས་མོལ་བྱེད་རྒྱུ་ཡིན་ཞེས་པའི་གསར་འགྱུར་བརྒྱུད་བསྐུར།  ༥༽ རྒྱ་མི་ཉེན་རྟོག་པ་འགས་རྒྱ་མི་མང་ཚོགས་ལ་རྒྱ་སྲང་ནས་གཅར་རྡུང་བྱེད་ཀྱིན་པའི་ནང་ལོག་གི་བརྙན་ཐུང་ཞིག་དྲ་ཐོག་ན་འཁྱར་གྱིན་པ་བརྒྱུད་བསྐུར་བྱས་པ།  ༦༽ སྐུ་ཞབས་ཝང་ལི་ཞུང་གི << བྱ་གཏོར། >> སོགས་དེབ་དྲུག་ཁ་པར་དུ་ཉར་བ་བཅས་གཙོར་བཟུང་འདུག

          གནད་དོན་སྔ་མ་བཞིའི་ཐད་ནས་ཁོ་བོས་སྔོན་མར་་དག་སེལ་སྒྲུབ་བྱེད་བཏང་ཟིན་མོད།  ཐེངས་འདིའི་ཉེས་དོན་ཐག་གཅོད་ཡི་གེའི་སྟེང་དུ་ང་རང་གིས་རྩ་ཁྲིམས་སོགས་ལས་དྲངས་པའི་སྒྲུབ་བྱེད་དག་ལ་ཁུངས་ཕེར་ཅི་ཡང་མི་འདུག་ཅེས་ཐག་གཅོད་གཏན་འབེབ་བྱས་འདུག   ཀྲུང་གོའི་ <<རྩ་ཁྲིམས>> སུ་གཏན་འབེབ་བྱས་པ་དག་ཀྱང་ཁུངས་ཕེར་གྱི་སྒྲུབ་བྱེད་མིན་ཚེ།  འབྲིང་རིམ་མི་དམངས་ཁྲིམས་ཁང་གིས་གཞི་འཛིན་ས་དེ་ཁོ་བོས་རྟོགས་དཀའ་མོད།  རེ་བ་ཏིལ་ཙམ་གྱི་ཆེད་དུ།  ངས་ཡང་བསྐྱར་རང་གི་བྱས་པ་ཁྲིམས་འགལ་མིན་པའི་སྒྲུབ་བྱེད་དང་བཅས།  བསམ་ཚུལ་ལྷུག་བརྗོད་བྱེད་རྒྱུ་ཡིན་པས།  ཁྱེད་ཞིང་ཆེན་མཐོ་རིམ་མི་དམངས་ཁྲིམས་ཁང་གིས་ཐུགས་གཞིག་ཟབ་བཞེས་གནང་རོགས་ཞུ།


             ༡༽ ཆོས་ལུགས་དད་མོས་རང་དབང་ནི་ཀྲུང་གོའི་  <<རྩ་ཁྲིམས>> སུ་གཏན་འབེབ་བྱས་པའི་སྤྱི་དམངས་ཀྱི་ཐོབ་ཐང་གལ་ཆེན་ཞིག་རེད།  ངས་རང་གི་བྲིས་རྩོམ་དུ་རྩ་ཁྲིམས་ཀྱིས་གཏན་འབེབ་བྱས་པའི་ཐོབ་ཐང་འདི་ཉིད་གཞིར་བྱས་ཏེ།  སྐུ་འབུམ་གྱི་མེ་ཏོག་མཆོད་མཇལ་སྐབས་མཚོན་ཆ་ཐོགས་པའི་དམག་མང་གི་དམ་དྲག་ལ་རང་གི་ལྟ་ཚུལ་བརྗོད་པ་དང་།  ཆོས་ལུགས་དད་མོས་རང་དབང་གི་རྒྱུན་ཤེས་འདི་ཉིད་རང་གི་ཀློག་མཁན་དག་ལ་ངོ་སྤྲོད་ཙམ་བྱས་པ་ཡིན།  སྤྱི་དམངས་ཤིག་ཡིན་པའི་ཆ་ནས། ཁྲིམས་ཀྱི་ཐོབ་ཐང་ལྟར་སྤྱི་ཚོགས་ཀྱི་སྣང་ཚུལ་ལ་དཔྱད་བརྗོད་སྤེལ་རྒྱུ་ནི་སོ་སོའི་རང་དབང་གི་ཐོབ་ཐང་རེད་ལ།  ཁྲིམས་ལུགས་ཀྱི་རྒྱུན་ཤེས་དག་གཞན་ལ་ངོ་སྤྲོད་བྱེད་ནི་འོས་འགན་རེད།  ངས་རྩ་ཁྲིམས་ལྟར་རང་གི་ཐོང་ཐང་དང་འོས་འགན་ལག་ལེན་དོན་འཁྱོལ་བྱས་པ་ལས།  ཁོ་ཚོས་བཤད་པའི་ཁ་བྲལ་སོགས་ནི་ཅི་ཡང་གླེང་མེད།  ཡང་གཅིག་བཤད་ན།  ངས་ཆབ་སྲིད་དང་ཆོས་ལུགས་ཀྱི་སྤྱིར་བཏང་འབྲེལ་བར་གཞིགས་ཏེ།  ཆབ་སྲིད་ཀྱིས་ཆོས་ལུགས་སྒེར་གཅོད་བྱས་པའི་མཇུག་འབྲས་དང་ཆོས་ལུགས་ཀྱི་དབང་ཆས་ཆབ་སྲིད་སྒེར་གཅོག་བྱས་པའི་མཇུག་འབྲས་ལ་རང་གི་བསམ་ཚུལ་བརྗོད་རྒྱུ་ཡིན་ཞེས་གསལ་བོར་བྲིས་ཡོད་ལ།  སྔ་མ་ནི་ད་རེས་ཀྱི་རྩོམ་འདི་དང་།  རྗེས་པ་ད་དུང་འབྲི་རྒྱུར་ལུས་ཡོད།  གསལ་བོར་བཤད་ན།  འདི་ནི་སྤྱིར་བཏང་དཔྱད་རྩོམ་ཐུང་ཐུང་ཞིག་ཡིན་པ་ལས།  ‘’རྒྱལ་ཁབ་ཁ་བྲལ ’’ ཞེས་པའི་ཆབ་སྲིད་ཀྱི་ཞྭ་མོ་ཆེན་པོ་དེར་འབྲེལ་བ་ཅི་ཡང་མེད།  རྨ་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གིས་ངའི་རྩོམ་ལས་ “….. འདི་ནི་བོད་མིའི་ཆོས་ལུགས་དང་མོས་རང་དབང་ལ་རྡོག་བརྫིས་བཏང་བ་ཙམ་མ་ཡིན་པར།  ཀྲུང་གོའི་སྤྱི་དམངས་ཡོངས་ཀྱི་ཆོས་ལུགས་དང་མོས་རང་ལ་རྡོག་བརྫིས་བཏང་བ་རེད་’’ ཅེས་པའི་སྐད་ཆ་དུམ་ཞིག་དྲངས་ནས་ང་ལ་རྒྱལ་ཁབ་ཁ་བྲལ་གྱི་བསམ་ཚུལ་འདུག་པར་ཉེས་འདོགས་བྱས་འདུག  བསམ་ཤེས་དག་གིས་བལྟས་ན་འདི་ན་ཤིན་ཏུ་དགོད་བྲོ་བ་ཞིག་མ་རེད་དམ།  ངས་འདིར་ཁ་བྲལ་ཞེས་པའི་ཟུར་ཙམ་ཡང་གླེང་མེད་པར་མ་ཟད།  རྒྱ་བོད་གཉིས་ལ་དབྱེ་བ་མ་ཕྱེས་པར་གཞི་གཅིག་ཏུ་སྦྱར་ནས་གླེང་ཡོད་ན།  ཁོ་ཚོས་བཤད་པའི་ཁ་བྲལ་ནི་གང་ཞིག་གང་ལས་འབྲེལ་བར་བསྟན་པ་ཆ་མ་འཚལ།  སྐབས་དེའི་དྲ་ཐོག་ཏུ་སྐུ་འབུམ་གྱི་མེ་ཏོག་མཆོད་པའི་གནས་ཚུལ་གྱིས་ཁྱབ་འདུག་པ་དང་།  གནས་མཇལ་བ་མང་མང་གིས་སོ་སོའི་ལྟ་ཚུལ་དག་གཅིག་རྗེས་གཉིས་འཐུད་ཀྱིས་དྲ་བའི་གང་སར་སྤེལ་གྱིན་འདུག་པ་ནི་ཁྱེད་ཚོས་ཤེས་གསལ་ལྟར་རེད།  ངས་གནས་ཚུལ་དེ་དག་ལ་བལྟས་རྗེས་གཞི་ནས་རང་གི་བསམ་ཚུལ་བྲིས་པ་ཡིན་ལ།  བར་བཅུག་འདྲ་པར་དག་ནི་གཞན་གྱི་བར་སྟོང་ལས་བླངས་པ་ཤ་སྟག་ལས།  རང་གིས་པར་དུ་བཏབ་པ་གཅིག་ཀྱང་མེད།  ཁོ་བོ་བླ་བྲང་དུ་སྡོད་པའི་མི་ཞིག་གིས་རང་གི་པར་མིག་སྐུ་འབུམ་དུ་བསྐོར་མི་ཐུབ་པ་ཕལ་བའི་མི་སུས་ཀྱང་གསལ་རྟོགས་ཐུབ།  ཡང་གཅིག་བཤད་ན།  ངས་སྐབས་དེའི་གནས་ཚུལ་རྩོམ་དུ་བྲིས་ཏེ་རང་གི་ལྟ་ཚུལ་གསོང་བོར་བརྗོད་པ་ནི་ངའི་རྩོམ་འབྲི་རང་དབང་གི་ཐོབ་ཐང་རེད།  ཐོབ་ཐང་འདི་ཉིད་རྩ་ཁྲིམས་སུ་བཏན་འབེབ་བྱས་ཏེ་འགན་སྲུང་ཁག་ཐེག་བྱས་ཡོད་པ་རེད།  སྤྱིར་བཏང་གི་རིག་གནས་ཁྱབ་ཁོངས་ཀྱི་སྣང་ཚུལ་འདི་འདྲ་ཞིག་ཛ་དྲག་ཆེ་བའི་ཆབ་སྲིད་ཀྱི་སྣང་ཚུལ་དུ་གྱུར་ཏེ།  རྒྱལ་ཁབ་ཁ་བྲལ་ལ་སྐུལ་སློང་བྱེད་པའི་གནས་ཚུལ་དུ་འགྱུར་ན།  འདྲ་པར་སོགས་སྐུ་འབུམ་གྱི་གནས་བབ་དྲ་ཐོག་ཏུ་སྤེལ་མཁན་མི་རིགས་སོ་སོའི་ཕྱོགས་ཡོང་མགྲོན་མཇལ་པ་དེ་དག་ནི་ཐད་ཀར་ཁ་བྲལ་གྱི་སྦྱོར་བ་རྩོམ་མཁན་དུ་ཨེ་འགྱུར་རམ།  འདི་ལྟར་རིགས་པས་དེད་ན་ཁ་བྲལ་པ་དང་ཁ་བྲལ་སྐུལ་སློང་བྱེད་མཁན་དུ་མི་འགྱུར་བའི་སྤྱི་དམངས་ཉུང་ཚོད་འདུག་པས།  རྣམ་རྟོག་ཐལ་དྲགས་པའི་སྦྱོར་བ་འདིས་སྒེར་གཅོད་ཀྱི་རྒྱ་དམ་པོ་ཞིག་མི་བཟོ་འམ།  འདི་ཉིད་ཀྲུའུ་ཞི་ཞིས་ཅིན་ཕིན་སོགས་ཀྱིས་གཏན་འབེབ་ལག་ལེན་བསྟར་གྱིན་པའི་ “རང་དབང་།  དམངས་གཙོ།  འདྲ་མཉམ།  དྲང་གཞག་ཁྲིམས་སྐྱོང་། ….” སོགས་ཀྱི་སྤྱི་ཚོགས་རིང་ལུགས་ཀྱི་རྩ་བའི་རིན་ཐང་ལྟ་ཚུལ་དང་རྒྱབ་འགལ་དུ་གྱུར་པ་མ་ཡིན་ནམ།  བསམ་བཞིན་གོང་རིམ་གྱི་གཏན་འབེབ་ལ་གཏོར་བརླག་བཟོས་འདྲར་སྣང་བའི་གནས་ཚུལ་འདི་འདྲར་ཕྱོགས་བཞིའི་རྒྱལ་ཁབ་དག་གིས་མི་འཕྱའམ།  མི་རབས་རྗེས་མ་དག་གིས་མི་ཁྲེལ་ལམ།  ཁྱེད་མཐོ་རིམ་མི་དམངས་ཁྲིམས་ཁང་གིས་བརྩད་ཞིབ་ཐུགས་གཞིག་གནང་རོགས།


        ༢༽  གསུམ་པའི་བཅུ་དྲུག་ཉིན་གྱི་དགོང་མོ་ང་རང་རེབ་གོང་མགྲོན་ཁང་དུ་ཡོད།  མཚན་གུང་ལ་ཉེན་རྟོག་པའི་ལྭ་བ་གྱོན་མཁན་ཞིག་དང་དམག་ལྭ་གྱོན་མཁན་གཉིས་ཀྱིས་ལག་ཏུ་མེ་མདའ་ཐོགས་ཏེ་ནང་དུ་འཛུན་འོང་ནང་ཞིབ་བཤེས་བྱེད་དགོས་ཟེར།  ངས་ཁོ་ཚོར་དཔང་ཡིག་སྟོན་པའི་རེ་བ་ཞུས་པར།  ཁོ་ཚོས་མེ་མདའ་ངའི་སྟེང་དུ་བཙུགས་ཏེ་སྐད་གསེང་མཐོན་པོས་རྫིག་རྫིག་བྱེད།  མེ་མདེའི་མདེལ་ཁུང་རང་ལ་གཏད་པའི་འཇིགས་སྐྲག་དེ་འདྲ་ནི་ངས་ཐོག་དང་པོར་མྱངས་པ་ཡིན།  སྨྲ་བསམ་བརྗོད་ལས་འདས་པའི་འཇིགས་སྣང་དེ་ལ་བརྟེན་ནས་ངས་རེབ་གོང་གི་བདེ་འཇགས་ལ་འཁང་ར་བྱས་པ་ཡིན།  ཉེན་རྟོག་པ་དང་ནག་ཚོགས་གང་ཡིན་མི་ཤེས་པའི་གནས་ཚུལ་གྱི་འོག་ནས་ངས་ཡི་གེ་དེ་བྲིས་ནས་བདེ་སྲུང་མི་སྣ་དང་སྤྱི་ཚོགས་ཀྱི་སྲུང་སྐྱོབ་ཐོབ་པར་རེ་བ་བྱས་ཡིན། གལ་ཏེ།  མཚན་མོ་དེར་ང་ལ་དྲག་བཤེར་བྱེད་མཁན་ཉེན་རྟོག་པ་དང་དམག་མི་ངོ་མ་ཡིན་ཚེ།  ཁྲིམས་ལུགས་ལྟར་ན་དཔང་ཡིག་མེད་པར་གཞན་ལ་བསྔོག་བཤེར་བྱེད་པ་ཁྲིམས་འགལ་རེད་པས།  གནོད་ཐེབས་མི་སྣ་ང་རེད་ལ།  ཁྲིམས་ཁང་གི་འགེབ་སྲུང་བྱ་ཡུལ་ང་རེད།  གལ་ཏེ།  དེ་དག་ནག་ཚོགས་ཡིན་ཚེ།  ལྷག་ཏུ་གནོད་ཐེབས་མི་སྣ་ང་རེད་ལ།  ཁྲིམས་ཁང་གི་སྲུང་བྱ་ང་རེད།  ཡིན་ནའང་།  བསམ་ཡུལ་ལས་འདས་པ་ཞིག་ལ།  ཁྲིམས་ཁང་གིས་ང་ལ་ཁ་བྲལ་ལ་སྐུར་སློང་བྱེད་མཁན་ཞེས་པའི་ཉེས་མིང་ཞིག་བཏགས་པར་མ་ཟད།   ༼གོང་ཞུས་ནང་དོན་ཁག་གིས་རང་རེའི་དམག་དང་ཉེན་རྟོག་པའི་འཆར་ཅན་ཞིབ་བཤེར་ལས་དོན་དེ་འཁྱོག་པར་བརྗོད་ནས་མི་དམངས་དངངས་སྐྲག་སྐྱེ་གཞི་རུ་བསྒྱུར་འདུག་པས། ཅུང་དྲག་པོའི་བསྙད་འདོགས་སྐུར་འདེབས་དང་། སྐུལ་སློང་གི་རང་བཞིན་ཅན་རེད།༽  上述內容將我軍警例行檢查歪曲成製造民眾恐慌的原因,存在較強的捏造、煽動性質。  ཞེས་ངས་རྫུན་བཟོ་བྱས་པར་བསྙད་བཏགས་འདུག  རྫུན་བཟོ་ཡིན་མིན་ཁྱོད་ཚོས་ཉིད་དེའི་བརྙན་མིག་ལ་བསྐྱར་ཞིབ་བྱོས་དང་གསལ་བོ་རེད།  སྐུལ་སློང་གི་རང་གཞིན་ཟེར་བ་ནི་ཧ་མི་གོ་བའི་གསང་བ་ཞིག་རེད།  ཁ་བྲལ་ལ་སྐུལ་སློང་རེད་ཟེར་ན།  ངས་ཁ་བྲས་གྱི་ཚིག་ཟུར་ཙམ་ཡང་བྲིས་མེད་པར་མ་ཟད།  སྐུལ་སློང་ནི་དེ་བས་ཀྱང་ངོ།།

      ངས་རང་ལ་གནོད་འཚེ་ཐེབས་པའི་གནས་ཚུལ་ཞིག་བྲིས་པས་ཀྱང་གཏད་སོ་མེད་པའི་ཉེས་མིང་ཞིག་ཏུ་འགྱུར་ན།   ངས་གནས་ཚུལ་དེ་ལ་བརྟེན་ནས་ཁྲིམས་ཁང་ལ་གཏུག་ཡིག་ཅིས་(ཅིག)བྲིས་ཚེ།  ང་རང་ཐད་ཀར་ཁ་བྲལ་བྱེད་མཁན་དུ་མི་འགྱུར་གྲང་།  བསམས་ཤིང་བསམ་ན་ཤ་འདར་རྒྱག་པའི་ཁྲིམས་ཆད་འདིས་ང་རང་ཅི་བྱ་གཏོལ་བྲལ་དུ་བཏང་བས།  ཁྱེད་མཐོ་རིམ་མི་དམངས་ཁྲིམས་ཁང་གིས་ང་ལ་དྲང་གཞག་གི་གནས་ལུགས་ཤིག་རྩོད་རོགས།


        ༣༽ “ གནམ་ས་གོ་འབྱེད།“ ཀྱི་ཚན་པ་ཐུང་ཐུང་དེ་ནི་གཞན་གྱིས་ངོ་བཤུས་བརྒྱབ་ཏེ་དྲ་ཐོག་དུ་བཞག་པ་ཞིག་རེད།  ངས་དེ་བརྒྱུད་བསྐུར་བྱེད་སྐབས་ “ འདི་ལ་ཡང་ཡང་བལྟས་དེ་ཡང་ཡང་སོམས། “ ཞེས་བྲིས་ཡོད།  རྒྱུ་མཚན་ནི།  ངས་ཡང་བསྐྱར་མི་ཤི་ཁྲག་བཞུར་གྱི་སྐྱོ་གར་དེ་འདྲ་མཐོང་མི་འདོད།  ངས་ནམ་ཡང་གཞན་གྱི་ཁྲག་དྲོན་ལ་བརྟེན་ནས་རང་གི་བདེ་སྐྱིད་བསྐྲུན་པར་ངོ་རྒོལ་བྱེད་ཀྱི་ཡོད།  ཀྲུང་གོ་ནི་མི་རིགས་ང་དྲུག་གིས་གྲུབ་པའི་རྒྱལ་ཁབ་ཆེན་པོ་ཞིག་རེད།  བོད་རིགས་ནི་དེའི་ཁྲོད་ཀྱི་མི་རིགས་ཆེ་ཤོས་ཤིག་རེད།  ང་རང་ཀྲུང་གོའི་སྤྱི་དམངས་ཤིག་ཡིན་པ་དང་།  ལྷག་པར་བོད་རིགས་ཤེས་ཡོན་པ་ཞིག་ཡིན་པའི་ངོས་ནས།  ངས་རང་གི་སྤུན་ཟླ་དག་གི་རླབས་ཆེ་བའི་ཚེ་སྲོག་ལ་འགན་འཁུར་དགོས།  གལ་ཏེ།  བྱེད་སྟངས་འདིས་རྒྱལ་ཁབ་ཁ་བྲལ་ལ་སྐུལ་སློང་བྱས་པ་རེད་ཟེར་ན།  དེ་ལས་དགོད་བྲོ་བ་ཞིག་མི་འདུག་མོད།  ངས་ཉེས་ཆད་འདི་དགའ་བཞིན་སྤྲོ་བཞིན་དང་ལེན་བྱེད་རྒྱུ་ཡིན་ཏེ།  ང་རང་ནམ་ཡང་རང་གི་སྤུན་ཟླའི་ཚེ་སྲོག་ལ་ཡང་ཁ་ཡ་མི་བྱེད་པའི་མི་ཞིག་བྱེད་མི་འདོད། ཐ་ན་རྒྱ་རིགས་སྤུན་ཟླ་དག་གི་ཆེད་དུ་ཡང་ངས་འདི་ལྟར་བསྒྲུབ་ཤ་སྟག་ཡིན།


       ༤༽ ཀྲུང་གོ་སྲིད་གཞུང་དང་གོང་ས་མཆོག་དབར་དུ་གྲོས་མོལ་བྱེད་རྒྱུ་ཡིན་པའི་གསར་འགྱུར་དེ་ནི་ནང་ཁུལ་ནས་བཏང་བ་ཞིག  ངས་ཀྱང་གྲོགས་པོ་ཞིག་གི་བར་སྟོང་ལས་བརྒྱུད་བསྐུར་བྱས་པ་ཡིན།   ནང་ཁུལ་ནས་བཏང་བའི་གསར་འགྱུར་ཞིག་བརྒྱུད་བསྐུར་བྱས་པས་ཀྱང་ཁྲིམས་དང་འགའ་འགྲོ་བ་ཨ་མཚར།  གྲོས་མོལ་དེ་འདྲ་སྔོན་ཆད་ཀྱང་བྱས་མྱོང་སྟེ།  ལོ་འགའི་ཡང་སྔོན་དུ་བོད་གཞུང་ནས་བཏང་བའི་ངོ་ཚབ་པ་ཀྲུང་གོ་ནང་ཁུལ་དུ་འོང་ནས་ཕན་ཚུན་གྲོས་མོལ་བྱས་པས།  འདི་ཉིད་རྒྱལ་ཁབ་ཀྱི་གསང་བ་སོགས་དང་འབྲེལ་བ་ཅི་ཡང་མེད་པ་རྨ་ལྷོ་ཁུལ་མི་དམངས་ཁྲིམས་ཁང་གིས་ཧ་གོ་མེད་པ་འདྲ།  དེ་མིན་ན།  ཐག་གཅོད་འདི་འདྲ་འོང་བའི་དཔེ་མེད།  བརྒྱ་ལ།  རྨ་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གི་བྱེད་སྟངས་ལྟར་ཐག་གཅོད་བྱས་ཚེ། ཁོ་བོ་ཙམ་པ་ཟད།  ཀྲུང་གོ་སྲིད་གཞུང་གིས་ཀྱང་ཚབས་ཆེའི་བྱས་ཉེས་བསགས་འདུག་ལ།  ནང་ཁུལ་གྱི་གསལ་ལམ་དག་ཀྱང་སྒོ་གཏན་དགོས་པའི་ཚད་དུ་འདུག་པས།  ཁྱེད་མཐོ་རིམ་མི་དམངས་ཁྲིམས་ཁང་གིས་ཐུགས་བསམ་བཞེས་རོགས།


         ༥༽  བརྙན་ཐུང་དེ་ནི་མང་ལོགས་ཀྱི་ས་ཆ་ག་གེ་མོ་ནས་བྱུང་བའི་དངོས་ཚུལ་རེད།  བརྒྱུད་བསྐུར་གྱི་གྲངས་ཚད་ཧ་ཅང་མཐོ།  ངས་ཀྱང་རྒྱ་རིགས་གྲོགས་པོ་ཞིག་གི་པོད་ཕྲན་ལས་བརྒྱུད་བསྐུར་བྱས་པ་ཡིན།  གཅར་རྡུང་མྱོང་མཁན་རྒྱ་རིགས་མང་ཚོགས་དེའི་སྡུག་བསྔལ་ལ་གདུང་སེམས་བཅངས་པ་ཡིན། གོང་ནས་བཤད་པ་བཞིན།  ངས་ “རྒྱ་རིགས་སྤུན་ཟླའི་ཆེད་དུ་ཡང་འདི་ལྟར་བསྒྲུབས་པ་ཤ་སྟག་ཡིན།”  འདི་རྒྱལ་ཁབ་ཁ་བྲལ་ཞེས་པར་འབྲེལ་བ་སྤུ་ཙམ་མེད།  ཁྲིམས་འགལ་གྱི་ཆ་ཡང་གང་དུ་འཚོལ།  རྨ་ལྷོ་ཁུང་འབྲིང་རིམ་མི་དམངས་ཁྲིམས་ཁང་གིས་བརྙན་ཐུང་འདི་ཉིད་ཀྱི་ནང་དོན་ཙམ་ལ་ཡང་བརྩད་རྒྱུས་མེད་པར།  བོད་དོན་དུ་བཏགས་ནས་ངའི་མགོ་བོ་ཆུང་ཆུང་འདིར་ཁ་བྲལ་ལ་སྐུལ་ལ་སློང་ཞེས་པའི་ཉེས་མིང་ལྗིད་ཏིག་ཏིག་ཅིག་བཀལ་བས་ཁོ་བོས་ཐེག་པར་དཀའ་ན།  ཁྱེད་ཞིང་ཆེན་མཐོ་རིམ་མི་དམངས་ཁྲིམས་ཁང་གིས་དཀར་འདོན་བྱེད་པར་རེ་ཞིང་སྒུག་ཡོད།


         ༦༽ སྐུ་ཞབས་ཝང་ལི་ཞུང་གི <<བྱ་གཏོར།>> སོགས་དེབ་འགའ་ལ་ངས་བལྟས་མྱོང་བ་བདེན།  ཡིན་ནའང་།  ངས་དེབ་དེ་དག་ལས་ཚིག་གཅིག་ཀྱང་ལུང་འདྲེན་བྱས་མ་མྱོང་ལ།  གཞན་ལ་བརྒྱུད་བསྐུར་ནི་དེ་བས་ཀྱང་ག་ལའོ།། <<བྱ་གཏོང།>> ནི་དེ་འདྲའི་བཀླགས་ཀྱང་མི་རུང་བའི་དེབ་ཅིག་ཡིན་ན།  རྩོམ་མཁན་ལ་ཁྲིམས་ལུགས་ཀྱི་དཀྱེལ་ཡངས་ཐོབ་འདུག་པ་ཤིན་ཏུ་ནས་ལེགས་སོང་།  ངས་དེ་ལྟ་བུའི་ཁྲིམས་ལུགས་ལ་བླ་ནས་གུས། རྩོམ་མཁན་ཁོང་ལྟ་བུ་ལ་རྒྱལ་ཁབ་དང་མི་རིགས་གང་ཡིན་རུང་གཅེས་སུ་འོས།  དེ་ལྟ་མོད་ཀྱང་།  རྩོམ་མཁན་ལ་དཀྱེལ་ཡངས་བྱས་དེ་ཀློག་མཁན་ལ་ཉེས་ཆད་གཅོད་པ་འདི་ཁྲིམས་ལུགས་ཀྱི་དོན་ཚན་གང་དུ་གཏོགས་པ་ཁོ་བོས་ཏན་ཏན་མི་ཤེས་ལགས།  ཁོ་བོ་ཁྲིམས་རྒྱུས་ཞན་དྲགས་པས་ཡིན་ན་བཟོད་གསོལ་ཞུ།  གལ་ཏེ་མིན་ན།  <<རྒྱལ་ཁབ་གཅིག་ལ་ལམ་ལུགས་གཉིས་>> ཀྱི་བྱེད་ཕྱོགས་འདི་འདྲར་ཁྱེད་མཐོ་རིམ་མི་དམངས་ཁྲིམས་ཁང་གིས་གསལ་ཁ་ཡག་པོ་འབྱེད་རོགས།


        ད་དུང་ཞུ་དགོས་པ་འདི་འདྲ་ཡང་ཡོད་དེ།  གྲོགས་པོ་འགས་ངའི་པོད་ཕྲན་བར་སྟོང་ལས་གོང་གི་ཟིན་ཐུང་གསུམ་མཐོང་མྱོང་ཞེས་པའི་སྐད་ཆའང་ཁྲིམས་འགལ་ཡིན་པའི་བདེན་དཔང་ཡང་དག་གི་གྲས་སུ་བཅུག་འདུག   དེ་དག་གིས་མཐོང་མྱོང་བ་ཙམ་གྱིས་ཁྲིམས་འགལ་དུ་འགྲོ་ན།  ངས་བྲིས་པ་ཐམས་ཅན་ཟད།  བྱ་བྱེའུ་འབའ་འབུ་ཚུན་ཆད་ཀྱང་ཁྲིམས་འགལ་དུ་ཨེ་མི་འགྲོ  འདི་ལྟའི་མིས་འཕྱ་ཁྱིས་འགོམ་གྱི་བདེན་དཔང་དུ་བསྙད་པ་དག་ལ་བློ་ལྡན་སུ་ཞིག་དང་ལེན་བྱེད།  ཡང་ཧ་མི་གོ་བ་ཞིག་ལ།  ཁོ་ཚོས་ངའི་ཁ་པར་ཀུ་ཤུ་ 5S ཞིག་ཀྱང་གཞུང་བཞེས་བྱས་སོང་།  དེའི་རྒྱུ་མཚན་ནི།  ཟིན་ཐོ་དེ་དག་ཁ་པར་བརྒྱུད་ནས་བསྔོགས་པས་ཡིན་འདུག  གལ་ཏེ།  ངའི་ཟིན་རྩོམ་དེ་དག་ཁྱིམ་གྱི་གནས་ག་གེ་མོ་ཞིག་ནས་རྙེད་པ་ཡིན་ཚེ།  ངའི་ཁང་ཁྱིམ་ཅ་ལག་དང་བཅས་པ་ཡང་གཞུང་བཞེས་བྱེད་རྒྱུ་ཨེ་ཡིན།  རྙེད་པ་ཡིན་ཚེ།  ངའི་ཁང་ཁྱིམ་ཅ་ལག་དང་བཅས་པ་ཡང་གཞུང་བཞེས་བྱེད་རྒྱུ་ཨ་ཡིན།  ཁོ་ཚོར་ཁ་རྒན་ལ་ཟ་ལོབས་དང་ལག་རྒན་ལ་ལེན་ལོབས་ཡོད་ཀྱང་།  ང་ལ་ “སྦྱིན་པ་” གཏོང་བྱེད་འབེལ་བོ་མེད་པས།  ཁྱེད་ཞིང་ཆེན་ཁྲིམས་ཁང་གིས་དབུལ་བོའི་རྩམ་ཁུག་ལ་འགོང་བོའི་རླུང་བུ་མི་རྒྱག་པར་མཁྱེན་མཁྱེན།

        མཐར།  ཁོ་བོ་ཀྲུང་ཧྭ་མི་དམངས་སྤྱི་འཐུན་རྒྱལ་ཁབ་ཀྱི་སྤྱི་དམངས་ཤིག་ཡིན་པས།  རང་གི་བསམ་ཚུལ་གསོང་བོར་བཤད་པའི་སྨྲ་བརྗོད་རང་དབང་གི་ཐོབ་ཐང་དང་།  རང་གི་དྲན་ཚུལ་རྩོམ་དུ་འགོད་པའི་རྩོམ་འབྲི་རང་དབང་གི་ཐོབ་ཐང་། <<རྩ་ཁྲིམས་>> སུ་གཏན་འབེབ་ཁག་ཐེག་བྱས་ཡོད་ཀྱང་།  ཁོ་བོར་ཁྲིམས་ལུགས་ཀྱི་མྱོང་རྒྱུས་ཞན་པས།  བཤད་ཉེས་འབྲེི་ཉེས་སུ་སོང་ན་མཐོང་ལོ་བཤགས།  ལྷག་ཏུ།  ཡུལ་ཆེན་དང་མིང་སྲིང་དག་གིས་མིག་མཐའི་མཆི་མ་མ་སྐམ་པར་ཁོ་བོར་བལྟས་ཡོད་ལ།  ཆུང་མ་དང་བུ་ཆུང་གིས་དུས་ཚོད་སྐར་ཆ་མ་སོང་བར་ཁོ་བོར་སྒུག་ཡོད་པས།  ཁྱེད་མཐོ་རིམ་ཁྲིམས་ཁང་གིས་གང་མགྱོགས་ཅི་མྱུར་གྱིས་ཐག་གཅོད་ཡག་པོ་འོང་བར་རེ་ཞིང་སྒུག་ཡོད།

 ཞེས་འབྲུག་ལོའམ་ཞོགས་ལྗང་དུ་འབོད་པས་གུས་ཕུལ།

ཕྱི་ལོ་ ༢༠༡༦ ལོའི་ཟླ ༢ པའི་ཚེས་ ༢༤ ཉིན།

འོད་དཀར་དྲ་ཚིགས་ཀྱིས་ཡི་གེར་ཕབ།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s