བོད་ཡིག་སློབ་དེབ་དང་འབྲེལ་བའི་གདུང་འབོད།

བྱང་ཨའི་བོད་ཡིག་སློབ་དེབ་དང་འབྲེལ་བའི་གདུང་འབོད་དྲག་ཁྲོས་སོ་བཞི་བ།

རྫ་ཚེ་རིང་བཀྲ་ཤིས།

ཀྱེ་མ་ཀྱེ་ཧུད་ཀྱེ་མ་ཀློང་། །
བརྡ་སྤྲོད་སྒྲོན་མེའི་འོད་ནུབ་ན། །
འཇིག་རྟེན་མུན་པ་གང་གི་སེལ། །
བོད་མིའི་སྡོམ་ཐག་གང་གིས་བྱེད། །

༢༽
ཐོན་མིའི་ཉིན་བྱེད་སྔ་ནས་ཡོལ། །
ས་པན་ཟླ་བའི་དཀྱིལ་འཁོར་ནུབ། །
མཁས་པའི་སྒྱུ་སྐར་ཉུང་བ་ན། །
འདྲེ་བྱའི་ཐན་སྐད་རི་ལུང་གང་། །


བོད་ལ་ཆབ་སྲིད་གཅིག་གྱུར་མེད། །
ཆོལ་གསུམ་སྐད་ཀྱི་གཅིག་གྱུར་མེད། །
འོན་ཀྱང་བརྡ་སྤྲོད་ཡི་གེ་ཡིས། །
གངས་ཅན་ད་བར་བཟླུམས་པ་ཡིན། །


འབྲུག་པས་ཆབ་སྲིད་མངོན་འདོད་ཆེད། །
བོད་ཡིག་བརྡ་སྤྲོད་རང་གར་བསྒྱུར། །
རྫོང་ཁ་ཞེས་པ་གསར་དུ་བཟོས། །
བོད་ཡིག་མིང་ལ་ཆོས་ཡིག་ཟེར། །

༥༽
འོན་ཀྱང་དེ་ཡི་མཇུག་འབྲས་ལ། །
གཞོན་སྐྱེས་སྐད་ཡིག་ཁྲོམ་ར་བརླགས། །
བཀའ་བསྟན་གཞུང་དང་རྫོང་ཁ་ཡི། །
བར་ཐག་རིང་པས་སྦྱང་འབྲས་ཞན། །

༦༽
སྐད་ཡིག་འཁོར་བསྐྱོད་ཁྱབ་ཁོངས་ལ། །
ཚད་ལས་བརྒལ་བའི་ཚད་བཀག་ཐེབས། །
དེ་ཡིས་གཞོན་སྐྱེས་ཕལ་མོ་ཆེ། །
དབྱིན་ཅིའི་སྐད་ཡིག་ཉམ་དམའ་ཞིང་། །


རང་གི་སྐད་ཡིག་མི་ཤེས་པའི། །
ཕུང་གསུམ་སྲིད་པ་བར་དོ་རུ། །
མྱ་ངན་ལམ་གོལ་འཁྱམ་བཞིན་པ། །
ཁ་བོས་སྔར་ནས་ཚོར་བ་ཡིན། །


འོན་ཀྱང་དེ་རིང་ཁར་རྩང་ལ། །
ཤེས་རིག་ལས་ཁུངས་ཀྱིས་བསྒྲིགས་ཤིང་། །
བོད་མིའི་ཆེད་དུ་བཟོས་སྐད་པའི། །
བརྡ་སྤྲོད་སྒྲོམ་གཞི་འཐོར་བ་ཡི། །

༩༽
ལྟས་ངན་འདྲེ་མོ་གཅེར་རྒྱུག་གིས། །
བོད་ཀྱི་སྐད་ཡིག་རིན་པོ་ཆེར། །
ཐན་དང་ལྟས་ངན་བཀྱེ་བ་མཐོང་། །
འདི་ལས་སྡུག་པ་ཅི་ཞིག་ཡོད། །

༡༠༽
ད་ལྟའི་དུས་ཀྱི་གཞོན་སྐྱེས་དག །
རང་གི་སྐད་ཡིག་མི་ཤེས་པ། །
མི་རེ་ངོ་རེ་ནས་བསམ་ན། །
ཧ་ཅང་ཚབས་ཆེན་ཡིན་མོད་ཀྱི། །

༡༡༽
འགོ་ན་ཡོད་པའི་སྒྲིག་འཛུགས་ཀྱིས། །
དབང་ཚད་འཆར་གཞི་ཡོད་པ་ཡིས། །
ལོག་པའི་འོབས་དོང་བཟོས་པ་དང་། །
བསྡུར་ན་ཕྱི་མ་རྫབ་ཆེན་ཡིན། །

༡༢༽
ཤིང་ནི་འཁྱོག་པོར་སྐྱེས་པ་བཞིན། །
ལམ་ལུགས་ངན་པ་བཟོས་ཟིན་ན། །
དེ་ལ་བསྒྱུར་དུ་མེད་པ་སྟེ། །
རིག་གཞུང་ཁ་བྲལ་ཆེན་པོ་ཡིན། །

༡༣༽
སྔར་མེད་དར་སྤེལ་མི་ནུས་པ། །
ནུས་པ་མེད་པས་ཅི་ཁག་སྟེ། །
སྔར་ཡོད་རྨང་ནས་གཏོར་བ་འདིར། །
སེམས་ཀྱི་གཏིང་ནས་ཚིག་པ་ཟ། །

༡༤༽
གོ་བདེའི་བསླབ་དེབ་རྩོམ་པ་དེ། །
ཁ་ཚ་དགོས་གཏུགས་བྱ་བ་ཡིན། །
ཁ་སྐད་རེ་གཉིས་བསྲེ་བ་ཡང་། །
གཡོལ་ཐབས་མེད་པ་བསམ་ཤེས་ཡོད། །

༡༥༽
བསླབ་དེབ་གོ་བདེར་སྒྱུར་བ་ལ། །
བརྡ་སྤྲོད་སྒྲོམ་གཞི་སྒྱུར་མི་དགོས། །
བ་ལས་འོ་མ་བཞོ་བ་ལ། །
ཕ་མ་བསད་ན་སྨྱོན་པ་ཡིན། །

༡༦༽
ས་གནས་རེ་ལ་ཡུལ་སྐད་ཡོད། །
དེ་ལ་དཔག་པའི་བརྡ་སྤྲོད་རེ། །
སྔོན་གྱི་མཁས་པས་མ་དྲན་མིན། །
འཕྲལ་གྱི་ཁེ་ཕན་མེད་པ་མིན། །

༡༧༽
རྟའུ་བ་ཡི་ལོག་སྐད་ནས། །
རྒྱལ་རོང་བ་ཡི་རོང་སྐད་ཚུན། །
ཆོལ་གསུམ་སྤྱི་དང་བྱེ་བྲག་ལ། །
ཡུལ་སྐད་དེ་ཙམ་མང་པོ་ཡོད། །

༡༨༽
ས་གནས་གནས་སྟངས་ཁར་ཁྱེར་ནས། །
རེ་རེའི་ལམ་རེ་བསྙེགས་གྱུར་ན །
བོད་ཀྱི་བརྡ་སྤྲོད་རིན་པོ་ཆེ། །
ཀྱེ་མ་སུ་ཡིས་འཛིན་པར་འགྱུར། །

༡༩༽
སྔ་མ་སྔོན་གྱི་དུས་ཤིག་ལ། །
འབྲུག་པའི་རྫོང་ཁ་དཔེར་བླངས་ནས། །
ལ་དྭགས་ཡུལ་སྐད་ཡི་གེར་བྲིས། །
དེ་ལ་མང་པོས་དགག་པ་བྱས། །

༢༠༽
དེ་རིང་བོད་མིའི་ཆེས་མཐོའི་གཞུང་། །
ད་དུང་ཤེས་རིག་ལས་ཁུངས་ལོ། །
མགོ་བོ་གསེར་སྐུས་བཅག་པ་དང་། །
རྡོ་ལུས་བཅག་ལ་ཁྱད་པར་མེད། །

༢༡༽
ཤེས་རིག་ལས་བྱེད་རྫ་མ་མགོར། །
ཨ་རླུང་ཚང་གི་མདོ་འཛིན་པས། །
སྔོན་འགྲོ་འཛིན་གྲྭ་དང་པོ་གཉིས། །
དམིགས་བཀལ་ཟུར་འཇོག་བྱས་ནས་སུ། །

༢༢༽
སློབ་དེབ་གཉིས་པའི་ནང་གསེས་ཐད། །
དམིགས་བཀལ་དྲི་བརྩད་བྱེད་པའི་སྐབས། །
རྒྱུ་མཚན་ཏིལ་ཙམ་མེད་པ་དང་། །
ངོ་ཚ་ཤིག་ཙམ་མེད་པ་ཡིས། །

༢༣༽
ཁ་ཡིས་ཟ་མ་ཟ་བ་ལ། །
ལྟག་པ་བསྐོར་བའི་ལན་ཞིག་བཏབ། །
བཤད་མཁན་གདོང་བ་མ་དམར་གོང་། །
ཉན་མཁན་ཚ་བེར་བྱེད་པ་བྱུང་། །

༢༤༽
བསྒོ་བ་རྣར་གཟོན་བྱེད་པ་དང་། །
བསམ་ཚུལ་རྩིས་མེད་གཏོང་བ་གཉིས། །
མང་གཙོ་འཁྲེབ་ཏོ་ཆགས་རྟགས་ཡིན། །
ནོར་འཁྲུལ་ནང་གི་ནོར་འཁྲུལ་ཡིན། །

༢༥༽
འབྲེལ་མེད་ལན་གྱིས་དུས་ཚོད་སྐྱེལ། །
རྫུན་གྱི་ལན་འདེབས་ཐོགས་མེད་བྱེད། །
ད་དུང་འཇིགས་ཞུམ་མེད་པ་འདིས། །
རྒྱ་གཞུང་ཕྱི་མགྲིན་དྲན་ལ་ཁད། །

༢༦༽
སེམས་ཀྱི་རྨ་ཁ་སྔར་ལས་ཟབ། །
སྡུག་གི་ན་བུན་སྔར་ལས་འཐིབས། །
ཀྱེ་མ་ས་མཐའི་བོད་ཕྲུག་དག །
དུས་འདིར་སྐྱེས་པ་བསོད་དེ་སྐམ། །

༢༧༽
མདོར་ན་རྩ་བའི་བརྡ་སྤྲོད་གཞུང་། །
བོད་སྐད་ཡི་གེའི་ཆོས་ཉིད་གཤིས། །
སྲོག་གི་རྩ་གནད་གཅོད་པ་འདི། །
ནག་ཉེས་ནང་གི་ནག་ཉེས་ཡིན། །

༢༨༽
གུང་ཁྲན་གཞུང་གིས་བརྒྱ་ཡིག་གཏུབ། །
ལྔ་སྟོང་ལོ་ཡི་རིག་གཞུང་བསྣུབས། །
འབྲུག་པ་གཞུང་གིས་བོད་ཡིག་བསྒྱུར། །
སྐད་དང་ཆོས་རིག་ཡ་བྲལ་བྱས། །

༢༩༽
ཤེས་རིག་ཚང་གིས་བརྡ་སྤྲོད་བསྒྱུར། །
སོ་སོར་རྒྱུ་མཚན་སྒྲོ་བ་གང་། །
ནག་ཉེས་ཆེ་ཤོས་ཁྲམ་པ་ཡིན། །
བཤད་རྒྱུ་ཁྲམ་པ་མང་ཤོས་ཡིན། །

༣༠༽
མཁས་པ་རྣམས་ཀྱིས་ལྕེ་ཟོར་དང་། །
བསྔགས་པ་རྣམས་གཏོར་ཟོར་དང་། །
ཚེ་ཟོར་ཉུང་ཟོར་ཐུན་ཟོར་སོགས། །
བོད་ཡིག་བསྣུབས་མཁན་རྣམས་ལ་རྒྱོབས། །

༣༡༽
གསར་འགོད་རྣམས་ཀྱི་ཁ་ཟོར་རྒྱོབས། །
བུད་མེད་རྣམས་ཀྱིས་ཐུ་ཟོར་རྒྱོབས། །
སྐད་འཕྲིན་ཚོགས་པ་ལ་སོགས་པའི། །
དྲ་དམངས་རྣམས་ཀྱིས་མཆན་ཟོར་རྒྱོབས། །

༣༢༽
གཤེད་མ་གཙོ་བོ་རྣམས་ལ་རྒྱོབས། །
གཙོ་བོ་དབང་ཆེན་རྣམས་ལ་རྒྱོབས། །
དབང་ཆེན་ལག་རིང་རྣམས་ལ་རྒྱོབས། །
ལག་རིང་བློ་ཐུང་རྣམས་ལ་རྒྱོབས། །

༣༣༽
རྒྱུན་དུ་ཁོང་ཁྲོ་ལངས་པ་ཉུང་། །
ཁ་ངན་ངན་སྨྲས་དེ་བས་ཉུང་། །
དེ་རིང་དྲན་ཚད་ཁ་ནས་བཤད། །
དགེ་སྡིག་གང་ཡོད་ཀ་ཁར་བསྔོ། །

༣༤༽
བསམ་བློ་གཅིག་ཏུ་མཐུན་པ་ཡི། །
གྲོགས་པོ་ཡོད་ན་ཡོད་རན་ཡིན། །
གཏམ་འདི་བདེན་པ་འདུག་སྙམ་ན། །
གཅིག་ནས་གཅིག་ཏུ་སྤེལ་བར་མཛོད། །

         ཞེས་པ་འདི་ཡང་། མི་ཚེ་འདིར་བོད་ཀྱི་སྐད་ཡིག་ལ་ལྡོག་ཏུ་མི་བཏུབ་པའི་ཞེན་ཁོག་གི་ནད་ངན་གྱིས་སྙིང་ཁ་དྲག་ཏུ་གཟིར་བའི་འབྲོག་རྒན་རྫ་ཚེ་རིང་བཀྲ་ཤིས་ཀྱིས་བྲེལ་ཟིངས་སྟོང་གི་བར་གསེང་ནས་དབུགས་ཐོག་གཅིག་ཏུ་བཅོས་མིན་གྱི་སེམས་ཚོར་ཁ་རུ་ཕྱུངས་པའོ།།      སྤྱི་ལོ་༢༠༡༦སྤྱི་ཟླ་༧ཚེས་༢༩ལའོ།།      (ཡིག་ནོར་མཆིས་ངེས)

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s