དབུ་ཁྱུད་དང་འབྲེལ་སྒྲ་ཞིག་གི་གཏམ་རྒྱུད།

དབྱངས་ཅན་བཞད་འཛུམ།

        ཞེ་ཉེ་བའི་ཀློག་པོ་ལགས།  སྒོར་མོ་ནི་འུ་ཅག་ཆེས་དགའ་བའི་དངོས་པོ་ཞིག་ཡིན་ལ།  ཉིན་མཚན་སྦྲེལ་ནས་དེ་ཐོབ་པར་འབད་པ་བྱེད་ཀྱིན་ཡོད།  ཁྱོད་ཀྱིས་ཀྲུང་གོའི་ཤོག་དངུལ་གྱི་ངོས་སུ་བོད་ཡིག་ཡོད་པར་དོ་སྣང་བྱུང་ངམ།  ཡིག་འབྲུ་ཉུང་ཉུང་འདི་ལ་དགའ་ཞིང་སྐྱོ་བའི་གཏམ་རྒྱུད་རིང་མོ་ཞིག་ཡོད་པ་ཨེ་ཤེས།

        ཀྲུང་གོའི་ཤོག་དངུལ་ཐོག་མར་བཟོ་བའི་ཚེ་བོད་ཡིག་ཀྱང་དེའི་ངོས་ལ་དབབ་པའི་ཐོབ་ཐང་བྱུང་།  ཐོབ་ཐང་དེ་གལ་ཆེ་མིན་གང་ལྟར་ཡང་།  སྐབས་དེར་རྩོད་པ་ཆེན་པོ་ཞིག་བྱུང་ཞིང་།  དེ་ནི་ ༼ཀྲུང་གོའི་མི་དམངས་དངུལ་ཁང༽ ཞེས་པ་འདིར་དབུ་ཁྱུད་དང་བྱེད་སྒྲའི་འི་འཇོག་དགོས་མིན་གྱི་རྩོད་པ་རེད།

        ཐོག་མར་དངུལ་བཟོ་སྡེ་ཁག་གིས་ཐག་མ་ཆོད་པར་ཀྲུང་དབྱང་ལ་ཕུལ་ཅིང་།  ཀྲུང་དབྱང་ལ་སླེབས་ཚེ་དགོས་མི་དགོས་ཀྱི་རྩོད་པའི་སྡེ་ཁག་གཉིས་ལ་ཆད་ནའང་གཅིག་ཐོག་ལ་མ་ཞོག་པར་བོད་ལྗོངས་ལ་ཐག་གཅོད་དུ་བཅུག  བོད་ལྗོངས་ཀྱིས་པཎ་ཆེན་རིན་པོ་ཆེར་ཕུལ་པས་ད་གཟོད་དཀའ་གནས་ཀྱི་ལྕགས་སྒྲོག་ཆེན་པོ་དེ་བཀྲོལ་ཅིང་།  རྩོད་པའི་མེ་དཔུང་ཆེན་པོ་དེ་ཞི་བར་བྱས།  ཁོང་གིས་དབུ་ཁྱུད་དང་འབྲེལ་སྒྲའི་འི་དགོས་པ་ནི་གངས་ཅན་སྒྲ་རིག་པའི་ཁྱད་ཆོས་ཡིན་ཅེས་གསུང་གཟི་བྱིན་ཅན་འདི་གནང་བས་ ༼༄༅། །ཀྲུང་གོའི་མི་དམངས་དངུལ་ཁང་།༽ ཞེས་པའི་ཚང་ལ་མ་ནོར་བའི་ངག་སྦྱོར་འདི་ཀྲུང་གོའི་ཤོག་དངུལ་གྱི་ངོས་སུ་ཕབ་ཐུབ་པ་བྱུང་།

       དེང་གི་དུས་སུ་དབུ་ཁྱུད་ [1] འབྲི་བའི་སྲོལ་རྒྱུན་ཉམས་ཤིང་།  འབྲེལ་སྒྲ་འདོར་བའི་དཔལ་ཐལ་ཆེ་བ་འདི་མཐོང་བ་དང་།  རང་གིས་ཀྱང་ད་སྔ་འདི་འདྲའི་ལས་ངན་བསགས་པ་བསམས་ཤིང་བསམས་ནས་ལོ་རྒྱུས་འདི་ཡི་གེར་ཕབ་ཡིན་ནོ། །

        [1]དབུ་ཁྱུད་ལ་བཀྲ་ཤིས་པའི་མཚོན་དོན་ལྡན་ཅིང་།  བཀྲ་མི་ཤེས་པ་བྱུང་བའམ།  སྡུག་བྱུང་ཚེ་བསྐུར་ཡིག་སོགས་སུའང་མི་འབྲི་ལ།  མ་བྲིས་པ་ཙམ་གྱིས་སྡུག་གམ་བཀྲ་མི་ཤེས་པ་བྱུང་བའི་དོན་གོ་བ་ཡིན་པས།   དེ་ལ་མྱ་ངན་གྱི་ཡི་གེའམ་འདུད་བྱེད་པའི་ཡི་གེ་ཞེས་གྲགས།  དཔེར་ན།  བྱེས་སུ་ཡོད་པའི་རང་གི་ཕུ་བོ་ལ་གཞིས་ཀྱི་ནུ་བོས་འཕྲིན་ཡིག་སྐུར་ཚེ་དབུ་ཁྱུད་མ་བྲིས་པས་ཕ་མ་ཚེ་ལས་འདས་པའམ།   བཀྲ་མི་ཤིས་པའི་དོན་ཞིག་བྱུང་བའི་བརྡ་རུ་གོ་བ་ལྟ་བུ་ཡིན།

2016.ཧོར་ཟླ09.06ཉིན།  རང་ཡུལ་དུ་བྲིས།

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s