རྒྱལ་བ་དགེ་འདུན་གྲུབ་གྱི་སྒྲོལ་མ་༢༡གི་འགྲེལ་པ།

༄༅། །འཕགས་པ་དཀོན་མཆོག་གསུམ་ལ་ཕྱག་འཚལ་ལོ། །དུས་གསུམ་སངས་རྒྱས་ཀུན་གྱི་འཕྲིན་ལས་མ། །རྒྱལ་བའི་ཡུམ་གྱུར་བཅོམ་ལྡན་སྒྲོལ་མ་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །ཡང་དག་པ་རྫོགས་པའི་སངས་རྒྱས་རྣམ་སྣང་གིས་གསུངས་པའི་ཕྱག་འཚལ་ཉི་ཤུ་རྩ་གཅིག་མ། ཇི་ལྟར་ནུས་བཞིན་འབྱེད་པར་ཤིན་ཏུ་གུས། དེ་ལ་རྒྱུད་འདི་སྔོན་གྱི་མཁས་པ་ཕལ་ཆེ་བ་ནི། །རྒྱུད་སྡེ་བཞིའི་ནང་ནས་བྱ་རྒྱུད་དུ་གཏོགས་ཞེས་གསུང་ངོ༌། དེ་ཡང་དེ་བཞིན་བཤེགས་པ་ཐམས་ཅད་ཀྱི་ཡུམ་སྒྲོལ་མ་ལ་བསྟོད་པ་ཞེས་བྱ་བའི་རྒྱུད་ལེའུ་སུམ་ཅུ་རྩ་ལྔ་ཡོད་པའི་ལེའུ་གསུམ་པ་ལ་ཕྱག་འཚལ་ཉི་ཤུ་རྩ་གཅིག་མ་འདི་གསུངས་སོ། །འདི་བྱ་རྒྱུད་ཡིན་མིན་བརྟག་སྟེ། ཕྱག་འཚལ་ཉི་ཤུ་རྩ་གཅིག་མ་འདི། བླ་མེད་རྒྱུད་དུ་བཀྲལ་བའང་འདུག་གསུང་ངོ༌། འདི་ལ་གཉིས། གླེང་གཞི་་དང༌། དངོས་བཤད་པ་འོ།།དང་པོ་ནི། དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་བ་ལ་བཀའ་སྩལ་པ། འཇམ་དཔལ་ཡུམ་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་ཡུམ་མོ། འཇམ་དཔལ་དེའི་ཕྱིར། དུས་གསུམ་གྱི་སངས་རྒྱས་ཐམས་ཅད་ཀྱིས་བསྟོད་པ་འདི། འཇམ་དཔལ་ཁྱོད་ཀྱིས་ཡིད་ལ་གྱིས་ཤིག །དེ་ནས་བཅོམ་ལྡན་འདས་ཀྱིས་བསྟོད་པའི་གཟུངས་སྔགས་གསུངས་པ་ཞེས་སོ། །གཉིས་པ་ལ། རྩ་བའི་སྔགས་ཀྱིས་བསྟོད་པ་འདི་དང༌། །ཕྱག་འཚལ་བ་ནི་ཉི་ཤུ་རྩ་གཅིག །ཅེས་གཉིས་སུ་ཕྱེ་བའི། རྩ་བའི་སྔགས་ཀྱིས་བསྟོད་པ་ནི། ན་མ་སརྦ་ཏཐཱ་ག་ཏཱ་ནཱཾ། ཏདྱ་ཐཱ། ཨོཾ་ན་མོ་སུ་ཀ་ས་ན་མ་ཏཱ་རེ་པཱ་ར་མི་ཏ་ཞེས་པ་འདི་ཡིན་ཞེས་འགའ་ཞིག་གསུང་ལ། སྤང་ལོ་ཆེན་པོ་ནི། ཨོཾ། ཕྱག་འཚལ་སྒྲོལ་མ་ཏཱ་རེ་དཔལ་མོ། །ཏུ་ཏྟཱ་ར་ཡིས་འཇིགས་པ་ཀུན་སེལ། །ཏུ་རེས་དོན་རྣམས་ཐམས་ཅད་རབ་སྟེར། །སྭཱ་ཧཱ་ཡི་གེར་བཅས་ལ་རབ་བདུད། །ཅེས་པ་རྒྱ་དཔེ་ལ་ཡོད་པ་སྤང་ལོས་བསྒྱུར་བ་འདི་ཡིན་གསུང་ཡང༌། རྩ་བའི་སྔགས་ཀྱིས་བསྟོད་པ་ནི། འདིར་བསྟན་སྔགས་དང་སྤེལ་མའི་བསྟོད་ཚིག་ཉི་ཤུ་པོ་འདི་ཡིན་ལ། ཕྱག་འཚལ་ཉི་ཤུ་རྩ་གཅིག་ནི། དེ་སྤེལ་བའི་ཕྱག་འཚལ་ཉི་ཤུ་རྩ་གཅིག་པོ་འདི་ཡིན་ཞེས་བླ་མ་རྣམས་གསུང་ངོ༌། །དེས་ན། མདོར་བསྟན་པ། རྒྱས་པར་བཤད་པ། ཕན་ཡོན་བསྟན་པ་དང་གསུམ། དང་པོ་ནི། ཨོཾ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཞེས་པ་འདི་ཡིན་པས། ཨོཾ་ཞེས་པ་ནི། སྐྱབས་སུ་འགྲོ་བའམ། མཆོད་པ་འབུལ་བའམ། མ་དག་པ་སྦྱོང་པའོ། །རྗེ་བཙུན་མ་ཞེས་པ་ལ། རྗེ་ནི། དུས་གསུམ་གྱི་སངས་རྒྱས་ཐམས་ཅད་བསྐྱེད་པའི་ཡུམ་གྱི་ནང་ནས་མཆོག་ཏུ་གྱུར་པའོ། །བཙུན་ཞེས་པ་ནི། ཕྱི་ལྟར་ན་སོ་ཐར། ནང་ལྟར་ན་བྱང་སེམས། གསང་བ་ལྟར་ན་སྔགས་ཀྱི་སྡོམ་པ་དང་ལྡན་པའོ། །འཕགས་མ་ནི། མཐོང་སྤངས་མི་དགེ་བ་ལས་རིང་དུ་སོང་ཞིང་འཁོར་འདས་ལས་འཕགས་པའོ། །སྒྲོལ་མ་ནི། སྡུག་བསྔལ་གྱི་རྒྱ་མཚོ་ལས་སྒྲོལ་བའོ། །མ་ཞེས་པ་ནི། སེམས་ཅན་ཐམས་ཅད་ལ་ཉེ་རིང་མེད་པར་འགྲོ་དོན་མཉམ་དུ་མཛད་པའོ།།ཕྱག་ཅེས་པ་ནི། །ལས་ཉོན་གྱི་སྡིག་སྒྲིབ་འཕྱག་པར་བྱེད་པའོ། །འཚལ་ཞེས་པ་ནི། ལུས་ངག་ཡིད་གསུམ་གུས་པར་བགྱིད་ཅེས་པའི་དོན་ཏོ། །གཉིས་པ་ལ། ལོ་རྒྱུས་ཀྱི་སྒོ་ནས་བསྟོད་པ་དང༌། སྐུའི་རྣམ་པའི་སྒོ་ནས་བསྟོད་པ། འཕྲིན་ལས་ཀྱི་སྒོ་ནས་བསྟོད་པ་དང་གསུམ། དང་པོ་ནི། ཕྱག་འཚལ་སྒྲོལ་མ་མྱུར་མ་དཔལ་མོ། །སྤྱན་ནི་སྐད་ཅིག་གློག་དང་འདྲ་མ། །འཇིག་རྟེན་གསུམ་མགོན་ཆུ་སྐྱེས་ཞལ་གྱི། །གེ་སར་བྱེ་བ་ལས་ནི་བྱུང་མ། །ཕྱག་འཚལ་ལོ་ཞེས་དྲང་ངོ༌། གང་ལ་ན། སྒྲོལ་མ་ལའོ། །དེ་གང་ལས་བྱུང་ན། སྐད་ཅིག་གིས་འཇིགས་པའི་ཕུང་པོ་ལྔའམ། བཞི་ལ་བརྟེན་པའི་འདོད་པ་དང༌། གཟུགས་དང༌། གཟུགས་མེད་པའི་ཁམས་གསུམ་གྱི་མགོན་སྐྱབས་འཕགས་པ་འཇིག་རྟེན་དབང་ཕྱུག་གིས་འགྲོ་བ་ཇི་སྙེད་ཅིག་འཁོར་བ་ལས་བཏོན་ཀྱང༌། ཉུང་དུ་མ་སོང་བར་གཟིགས་ནས། བཤུམས་པའི་སྤྱན་ཆབ་ལས་སྐྱེས་པའི་ཨུཏྤལའི་ཞལ་གྱི་གེ་སར་བྱེ་བ་ལས་བྱུང་བའོ། །དེས་སེམས་ཅན་གྱི་དོན་གྱི་མྱུར་བ་ནི། མྱུར་དུ་དེ་དག་འཁོར་བ་ལས་སྒྲོལ་བའི་ཞབས་ཏོག་བགྱིད་ལགས་ཀྱིས། སྤྱན་ཆབ་མི་གཏོང་བ་ཞུ། ཞུས་ནས་འཁོར་བའི་གཡུལ་ངོ་ཟློག་པ་ལ་དཔའ་མོའོ། །དེ་བས་ན། དེའི་སྤྱན་ཆབ་གཉིས་སྐད་ཅིག་གིས་གསལ་བའི་གློག་དང་འདྲ་བས་འཇིག་རྟེན་གསུམ་ལ་གཟིགས་པའོ། །འདི་ལ་པན་ཆེན་ཉི་མ་སྦས་པས། རབ་ཏུ་དཔའ་བའི་སྒྲོལ་མ་ཞེས་གསུངས་སོ། །༡ གཉིས་པ་ལ། ལོངས་སྐུའི་རྣམ་པའི་སྒོ་ནས་བསྟོད་པ་དང༌། ཆོས་སྐུའི་རྣམ་པའི་སྒོ་ནས་བསྟོད་པ་གཉིས། དང་པོ་ལ། ཞི་བའི་རྣམ་པའི་སྒོ་ནས་བསྟོད་པ་དང༌། ཁྲོ་་མོའི་རྣམ་པའི་སྒོ་ནས་བསྟོད་པ་གཉིས། དང་པོ་ལ། ཕྱག་འཚལ་དྲུག་ཡོད་པའི། དང་པོ་ཞལ་མདངས་གསལ་ཞིང་འོད་ཟེར་འཕྲོ་བའི་སྒོ་ནས་བསྟོད་པ་ནི། ཕྱག་འཚལ་སྟོན་ཀའི་ཟླ་བ་ཀུན་ཏུ། །གང་བ་བརྒྱ་ནི་བརྩེགས་པའི་ཞལ་མ། །ཞེས་སོགས་ཏེ། སྤྲིན་དང༌། ཁུག་སྣ་སོགས་ཀྱི་སྒོ་ནས་རྡུལ་དང་བྲལ་བའི། སྟོན་ཀའི་ཟླ་བ་ཀུན་ཏུ་གང་བ། ཞེས་སྐྱེ་འཕྲོ་རྫོགས་ཤིང་འདྲི་བའི་འགོ་མ་ཚུགས་པའི་ཉ་གང་བའི་ཟླ་བའོ། །དེ་འདྲ་བརྒྱ་ནི་བརྩེགས་པ་བས་ཏེ། བརྒྱ་སྤུངས་པ་ལས་ཀྱང་འོད་ཆེ་བའི་ཞལ་དང་ལྡན་མ། ཞལ་དེ་ནས་སྐར་མ་སྟོང་ཕྲག་ཚོགས་པ་བས་ཀྱང་རབ་ཏུ་ཕྱེ་བའི་འོད་རབ་འབར་མའོ། །ཡང་ན། བརྒྱད་གཉིས་བསྒྲིགས་ཞེས་འདོན་པ་ལྟར་ན། ཞལ་གྱི་ནང་ན་ཟླ་བ་ལྟ་བུའི་ཚེམས་བརྒྱད་གཉིས་བཅུ་དྲུག་བསྒྲིགས་པའི་ཞལ་རས་ལ་སྐར་མ་སྟོང་ཕྲག་ཚོགས་པ་བས་ཀྱང་ལྷག་པའི་འོད་འཕྲོ་ཞེས་པ་དང༌། བརྒྱད་པོ་དེ་གཉིས་བསྒྲིགས་ཞེས་པས། མཚན་བཟང་པོ་སོ་གཉིས་མཚོན་པའོ། །འདི་ལ་དཀར་མོ་མདངས་ལྡན་སྒྲོལ་མ་ཞེས་བཤད་དོ། །༢ གཉིས་པ་སྐུ་མདོག་དང༌། ཕྱག་མཚན་དང༌། རྒྱུའི་སྒོ་ནས་བསྟོད་པ་ནི། ཕྱག་འཚལ་སེར་སྔོ་ཆུ་ནས་སྐྱེས་ཀྱི། །པདྨས་ཕྱག་ནི་རྣམ་པར་རྒྱན་མ། །ཞེས་སོགས་ཏེ། སྔོ་བ་ནི་སྐུ་མདོག སེར་ནི། ཁ་དོག་དྭངས་པ་མཚོན་པ་སྟེ། སེར་མདོག་ཅན་གྱི་སྒྲོལ་མ་ཞེས་འབྱུང་བས་སོ། །དེའི་ཕྱག་གཡོན་གྱི་སྲིན་ལག་གིས་ཆུ་ནས་སྐྱེས་པའི་པདྨ་སྟེ་ཨུཏྤལས་ཐུགས་ཀར་རྣམ་པར་བརྒྱན་པ་སྟེ། བཟུང་ནས་སྙན་གྱི་ཐད་ཀར་ཁ་བྱེ་བ་ནི། ཕ་རོལ་ཏུ་ཕྱིན་པ་བཅུ་དག་པའི་རྟགས་སོ། །དེ་བས་ན། སྦྱིན་པ་བརྩོན་འགྲུས་དཀའ་ཐུབ་སྟེ་ཚུལ་ཁྲིམས། བཟོད་པ་བསམ་གཏན་སྤྱོད་ཡུལ་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་རྣམས་སོ། །ཞི་བ་ཞེས་པ། མི་མཐུན་ཕྱོགས། སེར་སྣ། ལེ་ལོ། འཆལ་ཚུལ། ཁོང་ཁྲོ། རྣམ་གཡེང༌། ལོག་པའི་ལྟ་བ་སོགས་ཞི་བ་ནི། སྒྲོལ་མའི་སྤྱོད་ཡུལ་ཏེ། དེའི་རྒྱུ་ལས་བྱུང་ཞེས་པའོ། །༣ གསུམ་པ། རྒྱལ་བ་དང༌། རྒྱལ་སྲས་ཀྱིས་གུས་པས་བསྟེན་པའི་སྒོ་ནས་བསྟོད་པ་ནི། ཕྱག་འཚལ་དེ་བཞིན་གཤེགས་པའི་གཙུག་ཏོར། །ཞེས་སོགས་ཏེ། དེ་བཞིན་གཤེགས་པ་ཐམས་ཅད་ཀྱི་ཡུམ་ཡིན་པས་དབུའི་གཙུག་ཏོར་ལྟར་འཁུར་ཞིང༌། དེ་བས་ན། ཚེ་འདིའྀ་རྒུད་པ་དང༌། ཉོན་མོངས་པའི་སྒྲིབ་པ་དང༌། འཁོར་གསུམ་དུ་གཏོགས་པ་སོགས་ཤེས་བྱའི་སྒྲིབ་པ་མཐའ་ཡས་པ་ལས་རྣམ་པར་རྒྱལ་བར་སྤྱོད་མའོ། །རྒྱལ་སྲས་ཀྱིས་བསྟེན་པ་ནི། ས་བཅུ་མ་ལུས་པའི་ངོ་བོ། ཕ་རོལ་དུ་ཕྱིན་པ་བཅུ་ཐོབ་པའི་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱིས་ཤིན་ཏུ་གུས་པའི་གཙུག་གིས་བསྟེན་མའོ། །འདི་ལ་གཙུག་ཏོར་རྒྱལ་བའི་སྒྲོལ་མ་ཞེས་འབྱུང་ངོ༌། །༤ བཞི་པ་མི་མཐུན་ཕྱོགས་གནོན་པའི་སྒོ་ནས་བསྟོད་པ་ནི། ཕྱག་འཚལ་ཏུ་ཏྟཱ་ར་ཧཱུྃ་ཡི་གེས། ཞེས་སོགས་ཏེ། ཏུ་ཏྟཱ་ར་ཧཱུྃ་ཞེས་པའི་གསུང་དང༌། ཐུགས་ཀའི་ཧཱུྃ་ཡིག་ནི། སྟོང་ཉིད་སྙིང་རྗེ་མཚོན་པས། དེས་མཐུན་ཕྱོགས་འདོད་པ་དང༌། ༠ཕྱོགས་གཟུགས་ཁམས་དང༌། ནམ་མཁའ་གཟུགས་མེད་ཁམས་ཏེ། འདོད་པ་ངན་སོང་གསུམ། འདོད་པའི་ལྷ་མི་གཉིས། གཟུགས་དང་གཟུགས་མེད་ཀྱི་འཇིག་རྟེན་བདུན་པོ། སྟོང་ཉིད་སྙིང་རྗེའི་སྙིང་པོ་ཅན་གྱི་ཞབས་ཀྱིས་མནན་ཏེ། ལུས་པ་མེད་པར་དེ་དག་བདེ་བ་ལ་འགུགས་པར་ནུས་མའོ། འདི་ལ་ཧཱུྃ་སྒྲ་སྒྲོག་པའི་སྒྲོལ་མ་ཞེས་འབྱུང་ངོ༌། །༥ ལྔ་པ་འཇིག་རྟེན་པའི་ལྷ་ཆེན་པོ་རྣམས་ཀྱིས་བསྟོད་པ་ནི། ཕྱག་འཚལ་ལོ། གང་ལ་ན། ལྷ་དབང་བརྒྱ་སྦྱིན། མེ་ལྷ། ཚངས་པ། རླུང་ལྷ་ལ་སོགས་སྣ་ཚོགས་པའི་དབང་ཕྱུག་སྟེ། གཙོ་བོ་རྣམས་ཀྱིས་མཆོད་པའི་སྒྲོལ་མའོ། །དེར་མ་ཟད་འབྱུང་པོའི་གཙོ་བོ་ཚོགས་བདག རོ་ལངས་ཀྱི་གཙོ་བོ་དབང་ཕྱུག་ཆེན་པོ། དྲི་ཚ་ཟུར་ཕུད་ལྔ་པ་ལ་སོགས་པ་རྣམས་དང༌། གནོད་སྦྱིན་གྱི་གཙོ་བོ་རྣམ་ཐོས་ཀྱི་སྲས་འཁོརགྱི་ཚོགས་དུ་མ་དང་བཅས་པ་རྣམས་ཀྱིས་མདུན་ནས་བསྟོད་མའོ། །འདི་ལ་རྣམ་པར་རྒྱལ་བའི་སྒྲོལ་མ་ཞེས་འབྱུང་ངོ༌། །༦ དྲུག་པ་ཕ་རོལ་འཇོམས་པའི་སྒོ་ནས་བསྟོད་པ་ནི། ཕྱག་འཚལ་ཏྲད་ཅེས་བྱ་དང་ཕཊ་ཀྱིས། ཕ་རོལ་འཕྲུལ་འཁོར་རབ་ཏུ་འཇོམས་མ། ཞེས་སོགས་ཏེ། དྲག་པོའི་སྔགས་ཀྱིས་ཕ་རོལ་གྱིས་བྱས་པའི་མཐུ་དང༌། བྱད་མ་ལ་སོགས་པའི་འཁྲུལ་འཁོར་གྱིས་གནས་སྐབས་དང༌། མཐར་ཐུག་གི་བདེ་བ་ལ་བར་དུ་གཅོད་པ་འཇོམས་མ་སྟེ། འདི་ལ་རྒོལ་བ་འཇོམས་པའི་སྒྲོལ་མ་ཞེས་འབྱུང་ངོ༌། །༧ དེ་ལྟ་བུའི་ཞི་བའི་བཞུགས་ཚུལ་ནི། གཡས་བསྐུམས་པ་ནི། སྟོང་ཉིད་རྟོགས་པ་མཚོན། གཡོན་བརྐྱངས་པ་ནི། སྙིང་རྗེ་མཚོན། དེ་ལྟ་བུའི་སྟོང་ཉིད་སྙིང་རྗེའི་ཞབས་ཀྱིས་སྲིད་གསུམ་མནན་ཏེ། མེ་འབར་འཁྲུག་པ་ཤིན་ཏུ་འབར་མ། ཞེས་པ་ནི། ཕྱི་ཁྲོ་མོར་གྱུར་པ། ད་ལྟ་ཡང་ཅུང་ཟད་ཁྲོས་པའི་ཚུལ་གྱི་མེ་འབར་བའི་དབུས་ན་འགྱིངས་པའོ། །གཉིས་པ་ཁྲོ་མོའི་རྣམ་པའི་སྒོ་ནས་བསྟོད་པ་ལ། ཕྱག་འཚལ་བདུན་ཡོད་པའི། དང་པོ་བདུད་དང་སྒྲིབ་གཉིས་སྦྱོང་བའི་ཡོན་ཏན་ནི། ཕྱལ་འཚལ་ཏུ་རེ་འཇིགས་པ་ཆེན་མོ། །བདུད་ཀྱི་དཔའ་བོ་རྣམ་པར་འཇོམས་མ། །ཞེས་སོགས་ཏེ། ཏུ་རེ་ནི་སྒྲོལ་མ། འཇིགས་པ་ཆེན་མོ་ནི། ཁྲོ་མོ། བདུད་ཀྱི་དཔའ་བོ་ནི། ཉོན་མོངས་པ་ཡིན་པས། དེ་ལ་སོགས་པ་བདུད་བཞི་རྣམ་པར་འཇོམས་མའོ། །གཞན་ཡང༌། དེ་ལྟ་བུའི་ཆུ་སྐྱེས་ཀྱི་ཞལ་ནི། ཁྲོ་གཉེར་ལྡན་མཛད་དེ། ཁྲོ་མོའི་ཆ་ལུགས་མཛད་དེ། ཁྲོ་མོའི་ཆ་ལུགས་མཛད་པས་ཐར་པ་ཐོབ་པ་ལ་བར་དུ་གཅོད་པའི་དགྲ་བོ་ཉོན་མོངས་པའི་སྒྲིབ་པ། ཐམས་ཅད་མཁྱེན་པ་ལ་བར་དུ་གཅོད་པའི་དགྲ་བོ་ཤེས་བྱའི་སྒྲིབ་པ་མ་ལུས་པ་སྟེ། བག་ཆགས་དང་བཅས་པ་གསོད་པར་མཛད་མའོ། །འདི་ལ་དབང་མཆོག་སྟེར་བའི་སྒྲོལ་མ་ཞེས་འབྱུང་ངོ༌། །༨ གཉིས་པ་གཡས་གཡོན་གྱི་ཕྱག་མཚན་གྱི་སྒོ་ནས་བསྟོད་པ་ནི། །གཡོན་པའི་ཕྱག་མཚན། ཕྱག་འཚལ་དཀོན་མཆོག་གསུམ་མཚོན་ཕྱག་རྒྱས། །སོར་མོས་ཐུགས་ཀར་རྣམ་པར་བརྒྱན་མ། །ཞེས་པས་མཐེབ་སྲིན་གཉིས་ཀྱིས་ཨུཏྤལ་བཟུང་ཞིང༌། མཛུབ་མོ་གུང་མོ། མཐེབ་ཆུང་གསུམ་གྱི་སོར་མོ་ཐུགས་ཀར་བརྐྱངས་པའི་ཚུལ་གྱིས་རྣམ་པར་བརྒྱན་མའོ། །གཡས་པའི་ཕྱག་མཚན། མ་ལུས་ཕྱོགས་ཀྱི་འཁོར་ལོས་བརྒྱན་པའི། །རང་གི་འོད་ཀྱི་ཚོགས་རྣམས་འཁྲུག་མ། ཕྱག་གཡས་ཀྱི་ཕྱོགས་མ་ལུས་པ་མཆོག་སྦྱིན་མཛད་པའི་ཕྱག་གི་མཐིལ་འཁོར་ལོས་བརྒྱན་པའི་རང་གི་ཕྱག་མཚན་གྱི་འཁོར་ལོའི་འོད་ཀྱིས། འོད་ཀྱི་ཚོགས་གཞན་རྣམས་འཁྲུག་པ་སྟེ་ཟིལ་གྱིས་གནོན་མའོ། །འདི་ལ་སེང་ལྡེང་ནགས་ཀྱི་སྒྲོལ་མ་ཞེས་འབྱུང་ངོ༌། །༩ གསུམ་པ་དབུ་རྒྱན་དང་བཞད་སྒྲའི་སྒོ་ནས་བསྟོད་པ་ནི། ཕྱག་འཚལ་རབ་ཏུ་དགའ་བ་བརྗིད་པའི། །དབུ་རྒྱན་འོད་ཀྱི་ཕྲེང་བ་སྤེལ་མ། །ཞེས་འཕགས་མའི་རྒྱན་གྱིས། རབ་ཏུ་དགའ་བ་དད་ཅིང་མོས་པའི་གདུལ་བྱ་རྣམས་ཀྱི་འདོད་པ་བསྐངས་ནས་བརྗོད་པ་ནི། འོད་གཞན་ཟིལ་གྱིས་གནོན་པའི་འོད་ཀྱི་ཕྲེང་བ་ནོར་བུའི་གཙུག་རྒྱན་དང་སྤེལ་མའོ། །སྔགས་ཀྱི་བཞད་སྒྲ་རབ་ཏུ་བཞད་པ་ཏཱ་རེ་ཡིས་བདུད་དང༌། འཇིག་རྟེན་གྱི་ལྷ་ཆེན་བརྒྱད་དབང་དུ་མཛད་མའོ། །འདི་ལ་མྱ་ངན་སེལ་བའི་སྒྲོལ་མ་ཞེས་འབྱུང་ངོ༌། །༡༠ བཞི་པ་ཕྱོགས་སྐྱོང་བཅུས་འཕྲིན་ལས་སྒྲུབ་པའི་སྒོ་ནས་བསྟོད་པ་ནི། ཕྱག་འཚལ་ས་གཞི་སྐྱོང་བ་ནི། ཕྱོགས་སྐྱོང་བཅུ་ཡིན་ལ། ཚོགས་རྣམས་ནི། འཁོར་དང་བཅས་པ་ཐམས་ཅད་འགུགས་པར་ནུས་མ་སྟེ། དེ་ཐམས་ཅད་བཀུག་ནས་འཕྲིན་ལས་སྒྲུབ་ཏུ་འཇུག་པའོ། །ཁྲོ་གཉེར་གཡོ་བ་ནི། ཁྲོ་མོར་བཞུགས་པའི་ཐུགས་ཀའི་ཧཱུྃ་ཡིག་གི་འོད་ཟེར་གྱིས། བདེ་བས་ཕོངས་ཤིང་སྡུག་བསྔལ་གྱིས་གཟིར་བ་ཐམས་ཅད་སྡུག་བསྔལ་དེ་ལས་རྣམ་པར་སྒྲོལ་བར་མཛད་མའོ། །འདི་ལ་འགུགས་པའི་སྒྲོལ་མ་ཞེས་འབྱུང་ངོ༌།༡༡ ལྔ་པ་དབུ་རྒྱན་གྱི་སྒོ་ནས་བསྟོད་པ་ནི། ཕྱག་འཚལ་ཟླ་བའི་རྩེ་མོས་དབུ་བརྒྱན། །བརྒྱན་པ་ཐམས་ཅད་ཤིན་ཏུ་འབར་མ། །ཞེས་པ་དབུ་རྒྱན་དངོས་ཏེ། ཟླ་བའི་རྩེ་མོ་སྟེ། ཚེས་གཅིག་གི་ཟླ་བས་དབུ་བརྒྱན་ཅིང༌། དབུ་རྒྱན་ཟླ་བ་ཐམས་ཅད་ལས། སྡུག་བསྔལ་སེལ་བའི་འོད་ཟེར་ཤིན་ཏུ་འབར་མའོ། །རལ་བའི་ཁྲོད་ན་འོད་དཔག་མེད་ལས། །རྟག་པར་ཤིན་ཏུ་འོད་ནི་མཛད་མ། །ཞེས་པ་ནི། དབུ་རྒྱན་གཉིས་པ་སྟེ། སྤྱི་གཙུག་གི་སྐྲའི་གསེབ་ན། སྣང་བ་མཐའ་ཡས་བཞུགས་པ་ལ། སེམས་ཅན་གྱི་དོན་དུ་དུས་རྟག་པར་ཤིན་ཏུ་སྟེ་མང་པོར་འོད་ནི། འགྱེད་པར་མཛད་མའོ། །འདི་ལ་བཀྲ་ཤིས་སྣང་བའི་སྒྲོལ་མ་ཞེས་འབྱུང་ངོ༌། །༡༢ དྲུག་པ་དྲག་པོའི་བཞུགས་ཚུལ་གྱི་སྒོ་ནས་བསྟོད་པ་ནི། ཕྱག་འཚལ་བསྐལ་བ་མཐའ་མའི་མེ་ལྟར། །འབར་བའི་ཕྲེང་བའི་དབུས་ན་གནས་མ། །གཡས་བརྐྱངས་གཡོན་བསྐུམས་ཀུན་ནས་བསྐོར་དགའ། །དགྲ་ཡི་དཔུང་ནི་རྣམ་པར་འཇོམས་མ། ཞེས་པ་སྟེ། བསྐལ་བ་མཐའ་མའི་མེ་ནི། ཉི་མ་བདུན་ལས་ཚ་བའི་འོད་ཟེར་གྱིས་ས་རྡོ་རྣམས་བསྲེགས་པ་ལྟར། ཡེ་ཤེས་ཀྱི་མེ་ལྕེ་འབར་བའི་ཕྲེང་བའི་དབུས་ན་ཁྲོ་མོའི་བཞུགས་ལུགས་བསྟན་ནས། ཞབས་གཡས་བརྐྱངས་ཤིང་གཡོན་བསྐུམས་ནས་དད་པས་ཆོས་འཁོར་བསྐོར་བར་དགའ་བའི་གདུལ་བྱ་རྣམས་ཀྱི་དགྲ་ཡི་དཔུང་ཉོན་མོངས་པ་རྣམ་པར་འཇོམས་པའོ། །འདི་ལ་སྨིན་པར་བྱེད་པའི་སྒྲོལ་མ་ཞེས་འབྱུང་ངོ༌། །༡༣ བདུན་པ་ཧཱུྃ་ཡིག་ལས་འོད་ཟེར་འཕྲོས་པའི་སྒོ་ནས་བསྟོད་པ་ནི། ཕྱག་འཚལ་ས་གཞིའི་ངོས་ལ་ཕྱག་གི། །མཐིལ་གྱིས་བསྣུན་ཅིང་ཞབས་ཀྱིས་བརྡུང་མ། །ཁྲོ་གཉེར་ཅན་མཛད་ཡི་གེ་ཧཱུྃ་གིས། །རིམ་པ་བདུན་པོ་རྣམས་ནི་འགེམས་མ། །ཞེས་པ་ལ། ཁྲོ་གཉེར་ཅན་མཛད་ཅེས་པ། ཁྲོ་མོའི་ཆ་བྱད་ཀྱི་ཞབས་གཡས་ཀྱི་མཐིལ་གྱིས་ས་ལ་བསྣུན་ཅིང༌། སྡིགས་མཛུབ་མཛད་དེ་ཐུགས་ཀའི་ཡི་གེ་ཧཱུྃ་གིས་འཇིག་རྟེན་རིམ་པ་བདུན་པོ་རྣམས་ཀྱི་སྲིད་མཚོ་འགེམས་མ་སྟེ། སྐེམས་མའོ། །འདི་ལ་ཁྲོ་གཉེར་གཡོ་བའི་སྒྲོལ་མ་ཞེས་འབྱུང་ངོ༌། །༡༤ གཉིས་པ་ཆོས་སྐུའི་རྣམ་པའི་སྒོ་ནས་བསྟོད་པ་ནི། ཕྱག་འཚལ་བདེ་མ་དགེ་མ་ཞི་མ། །མྱ་ངན་འདས་ཞི་སྤྱོད་ཡུལ་ཉིད་མ། །ཞེས་པ་རྗེ་བཙུན་གྲགས་པས། པད་མ་ནི་ཟག་མེད་ཀྱི་བདེ་བ་དང་ལྡན་མ། དགེ་མ་ཡང་སྤང་བྱ་ཉོན་མོངས་པ་དང་བྲལ་བས་དགེ་མ། ཞི་མ་ནི། འབྲས་བུ་སྡུག་བསྔལ་ཞི་མ། རྟོག་པ་ཞི་བའི་མྱ་ངན་ལས་འདས་པ་ལ་སྤྱོད་པ་ཉིད་མ་ཞེས་སོ། །ཡང་མཁས་པ་ཁ་ཅིག་ནི། རང་བཞིན་སྐྱེ་མེད་ལ་ཚོགས་ལམ་དུ་ཐོས་བསམ་གྱིས་སྒྲོ་འདོགས་ཆོད་ནས། མ་བདེ་བ་མེད་པས་བདེ་མ། སྦྱོར་ལམ་དུ་སྒོམ་བྱུང་གི་ཉམས་སུ་མྱོང་ནས་ཉོན་མོངས་རགས་པའི་རྣམ་རྟོག་གི་མཚན་མ་མེད་པས་དགེ་མ། མཐོང་ལམ་དུ་ས་བོན་དང་བྲལ་ནས། འབྲས་བུ་སྐྱེ་རྒ་ན་འཆི་སོགས་ཀྱི་སྡུག་བསྔལ་ཞི་བས་ཞི་མ། མི་སློབ་ལམ་དུ་བག་ཆགས་དང་བཅས་པ་ཞི་བའི་མྱ་ངན་ལས་འདས་པ་ཆོས་སྐུ་མངོན་དུ་མཛད་མའོ། །སྭཱ་ཧཱ་ཨོཾ་དང་ཡང་དག་ལྡན་པས། །སྡིག་པ་ཆེན་པོ་འཇོམས་པ་ཉིད་མ། །ཞེས་པ་གསུང་ཡི་གེ་བཅུ་པ། མཇུག་ཏུ་སྭཱ་ཧཱ། དང་པོར་ཨོཾ་དང༌། བར་དུ་སྔགས་བརྒྱད་དང་ཡང་དག་པར་ལྡན་པས། སྡིག་པ་ཆེན་པོ་དངོས་འཛིན་གྱི་གཏི་མུག་འཇོམས་པ་ཉིད་མ། ཞེས་པ་ཐུགས་དང༌། གསུང་ཆོས་སྐུའི་སྒོ་ནས་བསྟོད་པའོ།།འདི་ལ་དགེ་ལེགས་ཞི་བའི་སྒྲོལ་མ་ཞེས་འབྱུང་ངོ༌། །༡༥ གསུམ་པ་འཕྲིན་ལས་ཀྱི་སྒོ་ནས་བསྟོད་པ་ལ། ཕྱག་འཚལ་དྲུག་ཡོད་པའི། དང་པོ་ཞི་ཁྲོའི་སྔགས་ཀྱི་འཕྲིན་ལས་ནི། ཕྱག་འཚལ་ཀུན་ནས་བསྐོར་རབ་དགའ་བའི། །དགྲ་ཡི་ལུས་ནི་རབ་ཏུ་འགེམ་མ། །ཡི་གེ་བཅུ་པའི་ངག་ནི་བཀོད་པའི། །རིག་པ་ཧཱུྃ་ལས་སྒྲོལ་མ་ཉིད་མ། །ཞེས་པའི་ཡི་གེ་བཅུ་པའི་ངག་གི་བཀོད་པ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་པ་ཡི་གེའི་སྔགས་སོ། རིག་པ་ཧཱུྃ་ནི། ཨོཾ་ན་མ་ཏཱ་རེ་ན་མོ། ཧ་རེ་ཧཱུྃ་ཧ་ར་སྭཱ་ཧཱ། ཞེས་པ་ཁྲོ་མོའི་སྔགས་སོ། །དེ་གཉིས་ཀྱིས་ཀུན་ནས་དད་པས་ཆོས་འཁོར་བསྐོར་བ་ལ་རབ་ཏུ་དགའ་བའི་གདུལ་བྱ་རྣམས་ཀྱི་ཐར་པའི་དགྲ་བོ་ལུས་ནང་ལ་བདག་ཏུ་ཆགས་པ་དང༌། ཕྱི་རོལ་ལ་བདག་གིར་ཆགས་པ་རབ་ཏུ་འགེམས་མ་སྟེ། ཆགས་པ་འཇོམས་པའི་སྒྲོལ་མ་ཞེས་འབྱུང་ངོ༌།༡༦ གཉིས་པ་ཁྲོ་མོས་ཁམས་གསུམ་གཡོ་བའི་འཕྲིན་ལས་ནི། ཕྱག་འཚལ་ཏུ་རེའི་ཞབས་ནི་བརྡབས་པས། །ཧཱུྃ་གི་རྣམ་པའི་ས་བོན་ཉིད་མ། །ཞེས་སོགས་ཏེ། ཧཱུྃ་གི་རྣམ་པས་ས་བོན་ལས་སྐྱེས་པའི་ཏུ་རེའི་ཞབས་བརྡབས་པས་ཕྱི་རོལ་ན། རི་རབ་མནྡྷ་ར་དང་འབིགས་བྱེད་ལ་སོགས་པ། འཇིག་རྟེན་གསུམ་པོ་རྣམས་གཡོ་ནུས་པ་ཉིད་དོ། །འདི་ལ་བདེ་བ་སྒྲུབ་པའི་སྒྲོལ་མ་ཞེས་འབྱུང་ངོ༌། །༡༧ གསུམ་པ་བརྟན་གཡོའི་དུག་རྣམས་སེལ་བའི་འཕྲིན་ལས་ནི། ཕྱག་འཚལ་ལྷ་ཡི་མཚོ་ཡི་རྣམ་པའི། །རི་ དྭགས་རྟགས་ཅན་ཕྱག་ན་བསྣམས་མ། །ཞེས་སོགས་ཏེ། ལྷའི་མཚོ་ལྟ་བུའི་ཟླ་བའི་དཀྱིལ་འཁོར་རི་བོང་གི་རྟགས་ཅན་ཕྱག་ན་བསྣམས་མ་སྟེ། བརྟན་པའི་དུག་ཉོན་མོངས་པའི་གདུང་བ་སེལ་བའི་རྟགས་སོ། །ངག་ཏུ་ཏཱ་ར་གཉིས་བརྗོད་ཕཊ་ཀྱི་ཡི་གེས་གཡོ་བའི་དུག་རྣམས་མ་ལུས་པར་ནི་སེལ་མའོ། །འདི་ལ་རྣམ་པར་རྒྱལ་བའི་སྒྲོལ་མ་ཞེས་འབྱུང་ངོ༌།༡༨ བཞི་པ་རྩོད་པ་དང༌། རྨི་ལམ་ངན་པ་སེལ་བའི་འཕྲིན་ལས་ནི། ཕྱག་འཚལ་ལྷ་ཡི་ཚོགས་རྣམས་རྒྱལ་པོ། ཞེས་པ་འདོད་ལྷ་བརྒྱ་སྦྱིན་དང༌། གཟུགས་ཀྱི་ཚངས་པ་ཆེན་པོ་སྟེ་ལྷའི་ཚོགས་རྣམས་ཀྱི་རྒྱལ་པོ་དང༌། ལྷ་དང་མིའམ་ཅིའི་རྒྱལ་པོ་ལྗོན་པ་ཆེན་པོ་ལ་སོགས་པས་གཙུག་གིས་གུས་པས་བསྟེན་མ་སྒྲོལ་མ་ཉིད་དོ། །ཀུན་ནས་གུས་པས་སྐུ་ཞི་ཁྲོའི་ཆ་དང༌། ཞི་ཁྲོའི་སྔགས་ཀྱི་གོ་ཆ་དགའ་བའི་ཡིད་རྩེ་གཅིག་པས་ཡིད་ལ་བྱེད་ན། བྱིན་རླབས་ཀྱི་གཟི་བརྗིད་ཀྱིས་ཕ་རོལ་པོའི་རྩོད་པ་དང༌། རྨི་ལམ་ངན་པ་ཡང་སེལ་བ་ཉིད་དོ། །འདི་ལ་སྡུག་བསྔལ་སྲེག་བྱེད་སྒྲོལ་མ་ཞེས་འབྱུང་ངོ༌། །༡༩ ལྔ་པ་རིམས་ནད་སེལ་བའི་སྒྲོལ་མའི་འཕྲིན་ལས་ནི། ཕྱག་འཚལ་ཉི་མ་ཟླ་བ་རྒྱས་པ། ཞེས་ཉི་མ་རྒྱས་པ་ལྟ་བུའི་སྤྱན་གཡས་པ། ཟླ་བ་རྒྱས་པ་ལྟ་བུའི་སྤྱན་གཡོན་པ་ཅེས་གསུང་ཡང༌། ཉི་མ་རྒྱས་པ་ལྟ་བུའི་ཁྲོ་མོའི་སྤྱན། ཟླ་བ་རྒྱས་པ་ལྟ་བུའི་ཞི་བའི་སྤྱན་གཉིས་པོ་ལ་འོད་རབ་ཏུ་གསལ་བ་འཕྲོ་བ་དང༌། ངག་ཏུ་ཁྲོ་མོའི་སྔགས་ཧ་ར་གཉིས་བརྗོད། ཞི་བའི་སྔགས་ཏུཏྟཱ་ར་ཡི་སྔགས་བརྗོད་པ་ཡིས་ཤིན་ཏུ་དྲག་པོའི་རིམས་ནད་སེལ་མ་ཉིད་དོ། འདི་ལ་དངོས་གྲུབ་འབྱུང་གནས་སྒྲོལ་མ་ཞེས་འབྱུང་ངོ༌། །༢༠ དྲུག་པ་གདོན་དང་རོ་ལངས་འཇོམས་པའི་འཕྲིན་ལས་ནི། ཕྱག་འཚལ་དེ་ཉིད་གསུམ་རྣམས་བཀོད་པའི། །ཞེས་པ་སྐུ་གསུང་ཐུགས་ཀྱི་དེ་ཉིད་དེ། སྐུའི་དེ་ཉིད་སྤྱི་བོར་ཨོཾ། གསུང་གི་དེ་ཉིད་མགྲིན་པར་ཨཿ ཐུགས་ཀྱི་དེ་ཉིད་ཐུགས་ཀར་ཧཱུྃ་རྣམས་བཀོད་པའི་མཐུ་བརྟན་པའི། དུག་ཉོན་མོངས་ཞི་བའི་མཐུ་དང་ཡང་ལྡན་མ། གཡོ་བའི་དུག་གདོན་དང་རོ་ལངས་གནོད་སྦྱིན་ཚོགས་རྣམས་འཇོམས་པ་ལ། རབ་མཆོག་ནི། ཏུ་རེ་སྒྲོལ་མ་ཉིད་ཡིན་ནོ། །འདི་ལ་ཡོངས་སུ་རྫོགས་བྱེད་སྒྲོལ་མ་ཞེས་འབྱུང་ངོ༌། །༢༡ གསུམ་པ་ལ་ཕན་ཡོན་བསམས་པའི་ཁྱད་པར། དུས་ཀྱི་ཁྱད་པར། ཕན་ཡོན་དངོས་བཤད་པ། གྲངས་ཀྱི་སྒོ་ནས་ཕན་ཡོན་བསྡུས་ཏེ་བསྟན་པ་དང་བཞི། དང་པོ། ཞི་བ་དང་ཁྲོ་མོའི་རྩ་བའི་སྔགས་ཀྱི་བསྟོད་པ་ཉེར་གཅིག་པོ་འདི་དང༌། སྒོ་གསུམ་གུས་པས་ཕྱག་འཚལ་བ་ནི་ཉི་ཤུ་རྩ་གཅིག།ལྷ་མོ་སྒྲོལ་མ་ལ་གུས་པ་དང་ཡང་དག་པར་ལྡན་པས་ཏེ། ཁ་ཙམ་ཚིག་ཙམ་མིན་པར། རྩེ་གཅིག་པ་ཉིད་ཀྱི་བློ་ཤེས་རབ་དང་ལྡན་པ་གང་གིས་རབ་ཏུ་དད་པས་བརྗོད་པས། དུས་ནི། སྲོད་དང་ཐོ་རངས་མལ་ནས་ལངས་པར་བྱས་ནས། དྲན་པ་ཞེས་པ། སྤྱིར་སྐུ་དང༌། གསུང་སྔགས་དང༌། བསྟོད་པ། ཁྱད་པར་སྲོད་ཀྱི་དུས་སུ་ཁྲོ་མོའི་དང༌། ཐོ་རངས་ཀྱི་དུས་སུ་ཞི་བའི་སྐུ་སོགས་དྲན་པ་ཙམ་གྱིས་ཚེ་འདིའི་ནད་གདོན་དང༌། དུས་མིན་འཆི་བ་ལ་སོགས་པ་བར་ཆད་ཀྱི་མི་འཇིགས་པ་ཐམས་ཅད་རབ་ཏུ་སྟེར་བ། ཕྱི་མར་ངན་འགྲོའི་རྒྱུ་སྡིག་པ་ཐམས་ཅད་རབ་ཏུ་ཞི་བས་ན། འབྲས་བུ་ངན་འགྲོ་ཐམས་ཅད་འཇོམས་པ་ཉིད་དོ། ཕན་ཡོན་ནི། རྒྱལ་བ་བྱེ་བ་ཕྲག་བདུན་རྣམས་ཀྱིས་མྱུར་དུ་སྟེ། ཚེ་དེ་ཉིད་ལ་དབང་ནི་རིམ་པར་བསྐུར་བར་འགྱུར་ལ། ཚེ་འདི་ལ་མི་དང་མི་མ་ཡིན་དབང་དུ་འདུ་བ་ལ་སོགས་པའི་ཐུན་མོང་གི་༠ཚེ་བའི་དངོས་གྲུབ་ཐོབ་ཅིང༌། མཆོག་གི་དངོས་གྲུབ་སངས་རྒྱས་ཀྱི་གོ་འཕང་མཐར་ཐུག་དེར་འགྲོ། སངས་རྒྱས་ཀྱི་གོ་འཕང་དེའི་བར་དུ་གཅོད་པའི་དུག་ནི་དྲག་པོ་ཆེན་པོ་ལོག་ལྟ་ཉིད་དོ། དེ་མཐར་ཕྱིན་པ་བྱེད་ཅིང་བརྟེན་ནས་གནས་པར་བྱེད་པ་ནི། གཏི་མུག་གི་ཆོས་ཀྱིས་ཆོས་ཀྱི་གནས་ལུགས་ལ་སྐུར་བ་བཏབ་པ་ཙམ། ཞེ་སྡང་དྲག་པོས་ཆོས་དང་ཆོས་སྨྲ་བ་ལ་ཞེ་སྡང་བའི་ལས་རྣམས་འཇོམས་ཞེས་པ་བརྟན་པའི་དུག་རྣམས་སེལ་བའོ། །གཞན་ཡང་གཡོ་བའི་དུག་འགྲོ་བ་ཁྱི་དུག་དང༌། སྦྲུལ་དུག་གིས་ཟིན་པ་དང༌། ཟོས་པ་དང་ནི་འཐུངས་བ་སྟེ། ཟས་སྐོམ་གྱི་དུག་ཉིད་ཀྱང༌། ལྷ་མོའི་སྐུ་སོགས་དྲན་པ་ཙམ་གྱིས་རབ་ཏུ་སེལ་བ་ཉིད་ཐོབ་པ། སྡུག་བསྔལ་གྱི་རྒྱུ་སེལ་བའོ། །འབྲས་བུ་སྡུག་བསྔལ་དྲག་པོ་སེལ་བ་ནི། གདོན་དང་རིམས་དང་དུག་གིས་གཟིར་བ་སྟེ་སྐྱེ་བའི་སྡུག་བསྔལ་ཚོགས་ནི་རྣམ་པར་སྤོང་སྟེ། ཞེས་པ་རང་གི་དོན་ཏོ། །གཞན་དོན་ནི། སེམས་ཅན་གཞན་པ་རྣམས་ལ་ཡང་ངོ༌། །ཞེས་གཞན་གྱི་དོན་དུ་ཡང་གུས་པ་དང་ལྡན་པས་སྲོད་དང་ཐོ་རངས་ལངས་པར་བྱས་ཏེ། སྐུ་སོགས་ཡིད་ལ་དྲན་བཞིན་དུ་བརྗོད་ན་ཕན་ཡོན་གོང་བཞིན་དུ་ཐོབ་ཅེས་པའོ། །བཞི་པ་གྲངས་ཀྱི་སྒོ་ནས་ཕན་ཡོན་བསྡུས་པ་ནི། གཉིས་གསུམ་བདུན་དུ་མངོན་པར་བརྗོད་ན། །ཞེས་པ། གྲགས་པའི་མཎྜལ་བཞི་མ་ལྟར་ཏེ། དེའི་དོན་ལ་སྙན་ངག་པ་འགའ་ཞིག གཉིས་སུ་བརྗོད་ན་བུ་འདོད་པས་ནི་བུ་ཐོབ་འགྱུར་ཞིང༌། གསུམ་དུ་བརྗོད་ན་ནོར་འདོད་པས་ནི་ནོར་རྣམས་ཉིད་ཐོབ། བདུན་དུ་བརྗོད་ན་འདོད་པ་ཐམས་ཅད་ཐོབ་པར་འགྱུར་ཏེ་ཞེས་ཟེར། སྤང་ལོས་ནི། གཉིས་གསུམ་ཞེས་པ་ལ། གཉིས་ནི། སྒྲུབ་པ་པོ་རྟེན་གྱི་གང་ཟག་གི་ཁྱད་པར་ཏེ། བློ་ལྡན་གང་གིས་ཞེས་པས། དབང་རྣོན་ཆོས་ཀྱི་རྗེས་འབྲངས་དང༌། རབ་དད་ཅེས་པས་དབང་བརྟུལ་དད་པའི་རྗེས་འབྲངས་བསྟན་ལ། གསུམ་ཞེས་པས་དུས་ཀྱི་ཁྱད་པར་བསྟན་ཏེ། སྲོད་དང་ཐོ་རངས་ལངས་པར་བྱས་ནས་ཞེས་པ་ནམ་ལངས་ནས་སྲོད་ཐུན་གྱི་བར་རོ། །བདུན་དུ་མངོན་པར་བརྗོད་ན། ཞེས་པ་གྲངས་ཀྱི་ཁྱད་པར་ཏེ། དུས་གསུམ་པོ་དེ་ལ་བདུན་བདུན་ཏེ། བདུན་གསུམ་ཉི་ཤུ་རྩ་གཅིག་བརྗོད་ན། མི་འཇིགས་པ་ཐམས་ཅད་སྟེར་བ་ལ་སོགས་པ་འདོད་པ་ཐམས་ཅད་ཐོབ་པར་འགྱུར་ཏེ། དེ་ཐོབ་པ་ལ་ཡང་བར་ཆད་བྱེད་པར་མི་ནུས་པས། བགེགས་རྣམས་མེད་ཅིང་དེའི་གཉེན་པོ་རེ་རེས་སྤང་བྱ་རེ་རེ་འཇོམས་པར་འགྱུར་ཅེས་གསུངས་སོ། །རིན་པོ་ཆེ་བུ་སྟོན་གྱིས་ནི། གཉིས་ཞེས་བྱ་བ་ཉིན་མཚན་གྱི་ཆ་གཉིས། གསུམ་ཞེས་པ་དེ་རེ་རེ་ལ་ཐུན་གསུམ་གསུམ་སྟེ། ཉིན་མོ་ལ་སྔ་དྲོ། ཉིན་གུང་དགོང་ཐུན་གསུམ། མཚན་མོ་ལ་སྲོད་གུང་ཐུན། ཐོ་རངས་ཏེ་ཐུན་དྲུག་པོ་འདི་ལ། བདུན་བདུན་ཏེ་བཞི་བཅུ་རྩ་གཉིས་ཉིན་མཚན་ཕྲུགས་གཅིག་ལ་བརྗོད་ན། ཕན་ཡོན་དེ་རྣམས་འབྱུང་བ་ཡིན་གསུངས། རྗེ་བཙུན་འཕགས་མ་སྒྲོལ་མ་ལ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ཀྱིས་བསྟོད་པ་རྣམ་པར་དབྱེ་བ་རྫོགས་སོ།། །།ཡིག་འབྲུ་རེ་གཉིས་དག་མིན་དོགས་པ་འདུག་པས་མ་དཔེ་ཁུངས་ལྡན་ལ་གཟིགས་པར་ཞུ།

ཡོང་ཁུངས་དྲ་བ་གཞན།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s