འོད་དཀར་དྲ་ཚིགས།

ཤིང་བཟའ་སྤྲུལ་སྐུ།

རྒྱབ་ན་དཔུང་བ་བཙན་པོའི་རྒྱབ་རྟེན་ཞིག་མེད་ཀྱང་།།

རང་སེམས་རང་ལ་དབང་བའི་སྣང་བ་དེ་སྤྲོ་ཡོད།།

མདུན་ན་གཡས་གཡོན་སྐྱོར་བའི་འཁོར་ཚོགས་རེ་མེད་ཀྱང་།།

སེམས་ངོ་ཆོས་ལ་བརྩོན་པའི་སྤྲོ་སྣང་དེ་འཁོར་ཡོད།།

མིང་དང་རྒྱུ་ལ་བྲེལ་བའི་བདག་འཛིན་དེར་འཐབ་ནས།།

འཁོར་བའི་རྩ་བ་དུག་གསུམ་བློ་ངོ་རུ་འཕྲོད་ཡོད།།

ཚེ་འདིའི་འདི་སྣང་ནམ་མཁའི་གློག་འོད་དང་འདྲ་བ།།

མི་རྟག་འཁོར་བའི་ཆོས་ཉིད་སེམས་ངོ་རུ་འཕྲོད་ཡོད།།

ཕ་ཡུལ་ཕ་ཡུལ་ཟེར་ཡང་སྐད་ཅིག་གི་སྡོད་གནས།།

ཉེ་དུ་ཉེ་དུ་བརྗོད་ཀྱང་གནས་སྐབས་ཀྱི་འཚོ་རོགས།།

ལ་རྒྱ་ལ་རྒྱ་ཟེར་ཡང་བདག་འཛིན་གྱི་རྒྱུ་རྐྱེན།།

ཆོལ་ཁ་ཆོལ་ཁ་བརྗོད་ཀྱང་མིང་རྐྱང་གིས་བཏགས་ཙམ།།

ནམ་འཆི་རང་དབང་མེད་པའི་འཁོར་བ་ཡི་གནས་ནས།།

འཁྲུལ་སྣང་མ་རིག་མུན་པའི་འཐོམ་ཞྭ་རེ་གྱོན་ཏེ།།

ཁྱོད་དང་ངེད་ཚོ་ཟེར་བའི་ངར་འཛིན་གྱི་གཏམ་འདི།།

ཤི་དུས་དམྱལ་བར་འགྲོ་བའི་སྔ་ལྟས་དེ་ལོས་ཡིན།།

ཚེ་འདིའི་སྙན་གྲགས་ཕྱི་མའི་ངོ་སྲུང་དེ་མི་ཉན།།

ཚེ་གཅིག་གྲོགས་པོས་ཕྱི་མའི་འགྲོ་རོགས་དེ་མི་ཡོང་།།

ཚེ་འདིས་རྒྱུ་ནོར་ཕྱི་མའི་ལམ་བྲོ་དེ་མི་ཐུབ།།

ཚེ་འདིར་ཤི་དུས་གཅེར་བུར་ཁེར་རྐྱང་དུ་བསྐྱོད་དགོས།།

འཆི་བར་འཇིག་ན་མི་ཚེ་དོན་ལྡན་ལ་འབད་ནས།།

དཀར་ནག་ལས་འབྲས་བསྲུང་བར་ཉིན་མཚན་དུ་བརྩོན་དང་།།

ཤི་དུས་རྒྱགས་བྲོ་ཟེར་བ་འདི་ལྷག་ལས་མེད་པ།།

སྔོན་བྱོན་སྐྱེས་ཆེན་དག་གིས་ཡང་ཡང་དུ་གདམས་སྐད།།

༢༠༡༩།༨།༩ ཉིན་བྲིས།

འོད་དཀར་དྲ་ཚིགས།