འོད་དཀར་དྲ་ཚིགས།

རླུང་རྟ་དོན་གཉིས་ལྷུན་གྲུབ་བཀྲ་ཤིས་དགེ་མཚན་རྒྱས་པའི་འོད་སྣང་ཞེས་བྱ་བ་བཞུགས་སོ།

བསླུ་མེད་བླ་མ་ཡི་དམ་མཆོག་གསུམ་དང་། །

ཕ་རོལ་བདུད་དཔུང་འཇོམས་མཛད་གཡུལ་རྒྱལ་ལྷ་ཁང་། །

རྒྱལ་མཚན་རྩེ་མོའི་དཔུང་རྒྱན་མཐུ་སྟོབས་ཀྱིས། །

རྣལ་འབྱོར་བདག་གི་རླུང་རྟ་ཡར་ལ་སྐྱེད། །

བློ་གྲོས་ཉིན་བྱེད་གསལ་བའི་འོད་སྣང་གིས། །

མི་ཤེས་རྨོངས་བའི་སྨག་རུམ་མཐར་མཛད་ནས། །

བློ་བཟང་རྒྱལ་བའི་གཞུང་ལུགས་པདྨོའི་ཚལ། །

རྣམ་པར་བཞད་པའི་རླུང་རྟ་ཡར་ལ་སྐྱེད། །

སྡེ་སྣོད་གསུམ་གྱི་དགོངས་དོན་དཀའ་བའི་གནད། །

གཏན་ཚིགས་དགག་སྒྲུབ་སུན་འབྱིན་རིགས་ལམ་ལས། །

ལེགས་པར་དྲངས་པའི་སེང་གེའི་སྒྲ་དབྱངས་ཀྱིས། །

ཕས་རྒོལ་འཇོམས་པའི་རླུང་རྟ་ཡར་ལ་སྐྱེད། །

རྒྱལ་བའི་ལུང་བསྟན་ཀླུ་སྒྲུབ་ཡབ་སྲས་དང་། །

བློ་བཟང་རྒྱལ་བ་གཉིས་པ་ཡབ་སྲས་ཀྱི། །

གཞུང་ལུགས་རྟོགས་པའི་ལུང་རིགས་རྔ་གསང་སྒྲས། །

ས་གསུམ་ཁྱབ་པའི་རླུང་རྟ་ཡར་ལ་སྐྱེད། །

བྱང་ཆུབ་སེམས་མཆོག་ཡང་དག་ལྟ་བ་དང་། །

རིམ་གཉིས་ལམ་གྱི་རྟོགས་པ་མཐར་ཕྱིན་ནས། །

འབྲས་བུ་འོད་གསལ་ཟུང་འཇུག་ཆོས་ཀྱི་སྐུ། །

མངོན་དུ་འགྱུར་བའི་རླུང་རྟ་ཡར་ལ་སྐྱེད། །

གནས་སྐབས་ཆོས་ཀྱི་ཉེར་འཚེ་ཀུན་ཞི་ཞིང་། །

མཐུན་རྐྱེན་དཔལ་འབྱོར་དབྱར་གྱི་མཚོ་བཞིན་འཕེལ། །

ནད་མེད་ཚེ་བསོད་ཡར་ངོས་ཟླ་བ་ལྟར། །

གོང་དུ་འཕེལ་བའི་རླུང་རྟ་ཡར་ལ་སྐྱེད། །

མཆོག་གསུམ་ཀུན་འདུས་འཕགས་མའི་བྱིན་རླབས་དང་། །

དྲང་སྲོང་བདེན་ཚིག་སྨྲ་བའི་མཐུ་སྟོབས་ཀྱིས། །

བདག་གིས་སྨོན་པའི་རེ་བ་འདི་དག་གི །

འབྲས་བུ་མྱུར་དུ་འགྲུབ་པའི་བཀྲ་ཤིས་ཤོག །

ཅེས་པ་འདི་ནི་༧ཤིང་བཟའ་སྐྱེས་མིང་རྗེ་བཙུན་བློ་བཟང་མཁས་བཙུན་བཤད་སྒྲུབ་དམ་ཆོས་རྒྱ་མཚོས་སྦྱར་བའོ།།།།

བདག་དབང་ངེད་དྲ་ཚིགས་ལ་ཡོད།