འོད་དཀར་དྲ་ཚིགས།

དཔལ་ལྡན་རྩ་བའི་བླ་མ་རིན་པོ་ཆེ།།

བདག་གི་སྤྱི་བོར་པདྨོའི་སྟེང་བཞུགས་ལ།།

བཀའ་དྲིན་ཆེན་པོ་སྒོ་ནས་རྗེས་བཟུང་སྟེ།།

སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ།།

 

རྒྱ་གར་པཎ་གྲུབ་འཛིན་པའི་རང་ལུགས་འཆང་།།

གངས་ལྗོངས་བཙན་པོས་ཁ་བའི་ལྗོངས་སུ་དྲངས།།

རབ་བྱུང་ངུར་སྨྲིག་ཆོས་སྡེ་ཐོག་མར་བཙུགས།།

མཁན་ཆེན་བྷོ་དྷི་ས་ཏོར་གསོལ་བ་འདེབས།།

 

ནཱ་ལེན་ཊ་ཡི་ཆོས་སྡེ་ཆེན་པོ་རུ།།

པཎ་གྲུབ་ཀུན་གྱི་གཙུག་གི་རྒྱན་གྱུར་པ།།

གངས་ལྗོངས་རྒྱལ་བསྟན་རིས་མེད་གསལ་མཛད་པ།།

ཇོ་བོ་ཨ་ཏི་ཤཱ་ལ་གསོལ་བ་འདེབས།།

 

གངས་རིའི་ལྗོངས་སུ་ཇོ་བོ་་ཨ་ཏི་ཤཱ།

ཕེབས་པར་མཛད་ནས་བསྟན་པ་དག་ཐེར་མཛད།།

དེ་ཡི་རྒྱུད་འཛིན་བཀའ་གདམས་མེས་པོ་མཆོག།

འབྲོམ་སྟོན་རྒྱལ་བའི་འབྱུང་གནས་གསོལ་བ་འདེབས།།

 

བསྟན་པ་རིན་ཆེན་ཕྱོགས་ཀུན་དར་མཛད་ནས།།

བཀའ་གདམས་གསར་མའི་ཤིང་རྟའི་སྲོལ་འབྱེད་པ།།

ཨ་ཏི་ཤཱ་ཡི་སྤྲུལ་བུ་བློ་བཟང་གྲགས།།

གངས་ལྗོངས་མཛེས་པའི་རྒྱན་གཅིག་གསོལ་བ་འདེབས།།

 

དེ་ཡི་བརྒྱུད་འཛིན་ཀུན་གྱི་གཙུག་ནོར་མཆོག།

གཞོན་ནུའི་དུས་ནས་མཁས་པའི་སྙན་པ་རྒྱས།།

ལུང་རིགས་དུ་མས་རྒོལ་བ་ཚར་གཅོད་འཛིད།།

མཁས་གྲུབ་སྨྲ་བའི་ཉི་མར་གསོལ་བ་འདེབས།།

 

རྗེ་བཙུན་ཆོས་རྒྱལ་པཎ་ཆེན་བསོད་གྲགས་དང་།།

འཇམ་དབྱངས་བཞད་པ་མཁས་གྲུབ་བསྟན་དར་པ།།

གངས་རིའི་ལྗོངས་ཀྱི་ཕྱོགས་བཞིའི་གདོང་ལྔ་བཞི།།

ཡིག་ཆའི་བདག་པོ་བཞི་ལ་གསོལ་བ་འདེབས།།

 

རྒྱལ་དབང་པདྨོའི་སྐྱེ་རབས་ཕྲེང་བ་འཛིན།།

བོད་གཞུང་དགའ་ལྡན་ཕོ་བྲང་གསར་བཏོད་མཛད།།

རིས་མེད་བསྟན་པ་འཛིན་མཁས་རིན་པོ་ཆེ།།

རྒྱལ་དབང་ལྔ་བའི་ཞབས་ལ་གསོལ་བ་འདེབས།།

 

སཱ་ལའི་སྦྲུམ་དུ་མཁས་པའི་ཡལ་འདབ་རྒྱས།།

འཛམ་གླིང་ཀུན་ལ་འཚེ་མེད་ཞི་བདེ་སྤེལ།།

འཛམ་གླིང་ཞི་བདེ་རྟགས་མའི་གདུག་གོར་འཆང་།།

དྲིན་ཆེན་རྩ་བའི་བླ་མར་གསོལ་བ་འདེབས།།

 

འཕགས་པའི་ཡུལ་དུ་མགོན་པོ་ཀླུ་སྒྲུབ་དང་།།

ཁ་བའི་ལྗོངས་སུ་རྒྱལ་མཚན་འོད་ཟེར་དྲགས།།

བདེན་པའི་སྟོབས་ཀྱིས་ཆུ་བོ་ཕར་དུ་ལྡོག།

བྱང་ཆུབ་སེམས་དཔའ་ཁྱེད་ལ་གསོལ་བ་འདེབས།།

 

བཅུ་བདུན་བཞེས་ཚེ་དབུས་གཙང་ཡུལ་དུ་ཕེབས།།

ཉེར་བཞིའི་སྟེང་དུ་གནས་ལྔའི་བདགཔོར་གྱུར།།

གངས་ལྗོངས་ཡུལ་ལ་མཁས་པའི་སྙན་པ་རྒྱས།།

ཤིང་བཟའ་པན་ཊི་ཏ་ལ་གསོལ་བ་འདེབས།།

 

རྒྱུད་ཀྱི་རྒྱལ་པོ་དུས་ཀྱི་འཁོར་ལོ་ཡི།།

བསྟན་པའི་མངའ་བདག་རྡོ་རྗེ་འཆང་ཆེན་པོ།།

མདོ་སྨད་དབང་ལུང་ཀུན་གྱི་བདག་ཉིད་མཆོག།

ཤིང་བཟའ་རྡོ་རྗེ་འཆང་ལ་གསོལ་བ་འདེབས།།

 

མཐུ་སྟོབས་རྒྱས་ཏེ་ནག་ཕྱོགས་དམ་ལ་བཏགས།

སྙིང་སྟོབས་རྒྱས་ནས་རྒྱ་ནག་ཡུལ་དུ་ཕེབས།།

མ་ཧཱ་ཙི་ནའི་གོང་མའི་དབུ་བླར་བཞུགས།།

ཤིང་བཟའ་འཇམ་པའི་དབྱངས་ལ་གསོལ་བ་འདེབས།།

 

ལང་ཚོ་བཅུ་དྲུག་ཆ་ཤས་མ་རྫོགས་ཀྱང་།།

མཁས་པའི་སྙན་པས་འགྲོ་ཀུན་ནས་ཡིད་དབང་འཕྲོག་ཀྱང་།།

སེམས་ཅན་ལུས་ཀྱིས་བཅུ་དགུའི་སྟེང་དུ་གཤེགས།།

ལུང་རྟོགས་བསྟན་པའི་རྒྱལ་མཚན་ཞབས་ལ་འདུད།།

 

རིས་མེད་བསྟན་པ་འཛིན་པའི་མཁས་གྲུབ་དང་།།

བཀའ་དྲིན་དངོས་ཐོབ་དྲིན་ཆེན་བླ་མ་སོགས།།

གངས་ལྗོངས་རྒྱལ་བསྟན་འཛིན་པའི་ཐུགས་རྗེས་མཐུས།།

གངས་རིའི་བསྟན་པ་ཕྱོགས་ཀུན་རྒྱས་གྱུར་ཅིག།

 

མདོར་ན་རྗེ་བཙུན་བླ་མའི་སྐུ་ཚེ་བརྟན།།

བསྟན་པ་འཛིན་པའི་སྐྱེས་བུས་ས་སྟེང་གང་།།

བློ་བཟང་རྒྱལ་བའི་བསྟན་པ་ཕྱོགས་ཀུན་རྒྱས།།

བསྟན་པ་ཡུན་རིང་གནས་པའི་བཀྲ་ཤིས་ཤོག།

        རབ་གནས་ཤིང་སྤྲེལ་ཕྱི་ལོ་༢༠༠༣་ཟླ༡༠ཚེས༡༥ཉིན་སྙོམས་ལས་པ་ཤིང་སྤྲུལ་བློ་བཟང་བསྟན་འཛིན་ཆོས་ཀྱི་རྒྱལ་མཚན་གྱིས་བྲིས་པ་འདིས་ཀྱང་བསྟན་པ་དང་འགྲོ་བ་ཀུན་ལ་ཕན་པར་གྱུར་ཅིག    དགེའོ།། །།

ངེད་དྲ་ཚིགས།