ཆུ་བྱི་ ༡༩༡༣བོད་སོག་གཉིས་གྱི་བཞག་པའི་ཆིངས་ཡིག

ཆུ་བྱི་ ༡༩༡༣སོག་པོའི་རྒྱལ་ས་ཨུར་གར། བོད་སོག་གཉིས་དབང་ཆ་འདྲ་མཉམ་གྱི་བཞག་པའི་ཆིངས་ཡིག །
       ༄༅། །བོད་དང་། སོག་པོ་གཉིས་མན་ཇུ་ ༧གོང་མའི་དབང་འོག་ནས་ཐོན་ཏེ་རྒྱ་ནག་ནས་ཁག་ཁག་བྱས། རང་དབང་རང་བཙན་གྱི་གཞུང་ཞིག་བྱས་ནས།

སོག་བོད་གཞུང་གཉིས་ཕན་ཚུན་རྒྱུན་དུ་ཆོས་ལུགས་གཅིག་པའི་མཐུན་ལམ་དང་། དེ་སྔོན་གྱི་གྲོགས་པོའི་མཐུན་ལམ་ཉེ་རུ་གཏོང་བའི་ཆེད་དུ། རང་དབང་ལྡན་པའི་སོག་པོའི་རྒྱལ་ཁབ་ཀྱི་ཕྱི་རྒྱལ་བློན་ཆེན་ལས་ཚབ་ནིག་ཏ་སྦེ་ལིག་ཐུ། ཏཱ་བླ་མ་རབ་བརྟན་དང་། དམག་སྤྱི་བློན་ཆེན་གྱི་ལས་རོགས། མན་ལི་ཀ་ཀྲར། ཝི་ཙུ། གྲམ་ཀྲིན་འུ་རུན། བོད་ཀྱི་སྐྱབས་མགོན་ཏཱ་ལའི་བླ་མའི་སྐུ་ཚབ་སྐུ་བཅར་མཚན་ཞབས་མཁན་ཆེ་བློ་བཟང་ངག་དབང་། དངུལ་ཁང་དོ་དམ་མགྲོན་གཉེར་ངག་དབང་ཆོས་འཛིན། དྲུང་ཡིག་དགེ་འདུན་རྒྱལ་མཚན་བཅས་ནས་གཤམ་གསལ་ལྟར་ཁས་ལེན་བྱེད་རྒྱུ།

དོན་ཚན་དང་པོ། 
     ཞྭ་སེར་བསྟན་པའི་བདག་པོ་རྗེ་བཙུན་དམ་པ་སོག་པོའི་ལུང་པའི་བདག་པོར་ལྕགས་ཕག་ལོ། ཟླ་ ༡༡ ཚེས་༩ ཉིན་དྲིལ་བསྒྲགས་བྱས་པ་ལྟར་བོད་ཀྱི་དབུ་འཛིན་ཏཱ་ལའི་བླ་མ་ནས་ངོས་འཛིན་དང་། ཁས་ལེན་ཆ་འཇོག་གནང་རྒྱུ།

དོན་ཚན་གཉིས་པ། 
     སྐྱབས་མགོན་ཏཱ་ལའི་བླ་མ་བོད་རང་དབང་རང་བཙན་གྱི་བདག་པོར་སོག་པོ་ལུང་པའི་བདག་པོ་རྗེ་བཙུན་དམ་པ་ནས་ངོས་འཛིན་དང་། ཁས་ལེན་ཆ་འཇོག་གནང་རྒྱུ།

དོན་ཚན་གསུམ་པ། 
     སོག་བོད་རྒྱལ་ཁབ་གཉིས་ཀ་གོ་བསྡུར་ནན་ཏན་གནང་སྟེ་ནང་པའི་བསྟན་པ་དར་ཞིང་རྒྱས་ཐབས་ལ་དགོངས་བཞེས་གནང་རྒྱུ།

དོན་ཚན་བཞི་པ། 
     ད་ནས་བཟུང་བོད་དང་། སོག་པོའི་རྒྱལ་ཁབ་ལ་ཕྱི་དགྲ་དང་།  ནང་དགྲ་ག་ནས་བྱུང་རུང་གཅིག་གིས་གཅིག་ལ་རྒྱུན་དུ་རོགས་རམ་གནང་རྒྱུ།

དོན་ཚན་ལྔ་པ། 
     བོད་དང་། སོག་པོའི་ས་ཆའི་ཐོག་ལ་ཆོས་དང་། ཚོང་སོགས་གཞུང་སྒེར་འགྲུལ་མི་རྣམས་ལ་སྲུང་སྐྱོབ་དང་། རོགས་རམ་བྱེད་རྒྱུ།

དོན་ཚན་དྲུག་པ།
     བོད་དང་། སོག་པོའི་རྒྱལ་ཁབ་གཉིས་སོ་སོའི་ལུང་པའི་ཐོན་ཟོག་དང་། སེམས་ཅན་སོགས་སྔར་རྒྱུན་ཚོང་ཇི་ཡོད་རྒྱག་རྒྱུ་དང་། ལག་ཤེས་བཟོ་གྲ། ཤེས་རིག་སོགས་ཡར་རྒྱས་གཏོང་རྒྱུ།

དོན་ཚན་བདུན་པ། 
     ད་ནས་བཟུང་དངུལ་གྱི་སྤྲོད་ལེན་རྣམས་གཞུང་གི་བཀའ་དང་མ་འབྲེལ་བར་སྤྲོད་ལེན་གན་ཡིག་བཞག་མི་ཆོག །གལ་ཏེ་བཀའ་དང་མ་འབྲེལ་བར་བཞག་པ་བྱུང་ན་གཞུང་ནས་འདེད་ལེན་རྒྱབ་གཉེར་བྱེད་རྒྱུ་མིན། ཆིངས་ཡིག་འདི་མ་རྒྱབ་གོང་ལ་དེ་འདྲའི་ཡིག་ཆ་ཡོད་པ་དང་། ཐག་མ་ཆོད་པའི་སྤྲོད་ལེན་ཆེན་པོ་ཡོད་པ་ཡིན་ན་གཞུང་ནས་རྒྱབ་གཉེར་གྱིས་སྤྱོད་འཇུག་རྒྱུ། འོན་ཀྱང་བུན་ལོན་འདི་ཚོ་ཤ་ཕོ་ནར་དང་། ཧོ་ཤོན་ཡིན་ན་གཞུང་ནས་ངོས་འཛིན་ཆ་འཇོག་བྱེད་ཀྱི་མ་རེད།

དོན་ཚན་བརྒྱད་པ། 
     ཆིངས་ཡིག་འདིའི་ནང་ལ་ཚུད་པའི་དོན་ཚན་འདྲ་རྗེས་སུ་འཇུག་དགོས་པ་བྱུང་ཚེ་བོད་དང་། སོག་པོའི་གཞུང་གཉིས་ནས་སྐུ་ཚབ་གསར་དུ་བསྐོ་གཞག་ཐོག་ནས་དུས་ཚོད་དང་བསྟུན་པའི་སྣོན་ཕྲི་བྱེད་རྒྱུ།

དོན་ཚན་དགུ་པ། 
    ད་ཉིན་ཆིངས་ཡིག་ལ་ལག་རྟགས་བརྒྱབ་པ་ནས་བཟུང་འདི་དོན་རྩ་འཛིན་རྒྱུན་འཁྱོངས་བྱེད་རྒྱུ་ཡིན། རང་དབང་ལྡན་པའི་སོག་པོའི་གཞུང་གི་ཆིངས་ཡིག་རྒྱག་མི་ཕྱི་རྒྱལ་བློན་ཆེན་ལས་ཚབ་སྦི་ལིག་ཐུ། ཏཱ་བླ་མ་རབ་བརྟན་དང༌། དམག་སྤྱི་ལས་རོགས། མན་ཉི་ལ་ཀྲར། སྦི་ཙུ། གྲམ་ཀྲིན་སུ་རུན། རང་དབང་ལྡན་པའི་བོད་གཞུང་ཏཱ་ལའི་བླ་མའི་ཆིངས་ཡིག་རྒྱག་མི་སྐུ་བཅར་མཚན་ཞབས་མཁན་ཆེ་བློ་བཟང་ངག་དབང་དང་། དངུལ་ཁང་དོ་དམ་མགྲོན་གཉེར་ངག་དབང་ཆོས་འཛིན། དྲུང་ཡིག་དགེ་འདུན་རྒྱལ་མཚན་བཅས་ཀྱི་ལག་རྟགས་དང་། དམ་ཕྲུག་རྒྱབ་ཡོད། སོག་པོ་རང་བཙན་ལོ་གཉིས་པ། ཟླ་ ༡༢ ཚེས་ ༤། བོད་ཆུ་བྱི་ཟླ་༡༢ ཚེས་ ༤ལ།། 
ཆིངས་ཟིན་ཡིག་ཆ་ཕྱོགས་བསྡེབས་ནས་བཤུས་པ་ཡིན།།
མཆན། ཆིངས་ཡིག་འདིའི་ཡི་གེ་གཞི་འཛིན་ས་བོད་ཀྱི་སྲིད་དོན་རྒྱལ་རབས། པར་ཐེངས་ལྔ་བ།  བོད་གཞུང་ཤེས་པར་ཁང་ནས་ཕྱི་ལོ་༡༩༩༧ ལོར་དཔར་བསྐྲུན་ཞུས། ཤོགས་གྲངས་ ༦༣༣། ༦༣༥ ནས།

དཔྱད་མཆན་སྤེལ།

%d bloggers like this: