ཤིང་བཟའ་པཎྜི་ཏའི་བསླབ་བྱ་བླང་དོར་འབྱེད་པའི་སྒྲོན་མེ།

༄༅། །བསླབ་བྱ་མདོར་བསྡུས་བླང་དོར་འབྱེད་པའི་སྒྲོན་མེ་ཞེས་བྱ་བ་བཞུགས་སོ།།

༄༅། །ཨོཾ་སྭ་སྟི ཨེ་མ་དལ་འབྱོར་འབྲས་ལྡན་སྐྱེད་ཚལ་དུ། །
ཐུབ་པའི་བརྟུལ་ཞུགས་རྣམ་དག་ཚུལ་ཁྲིམས་ཀྱིས། །
ལེགས་པར་བསྡམས་པའི་ཐོས་སོགས་བཟླས་བརྗོད་ལ། །
གཞོལ་བའི་དྲང་སྲོང་དེ་ཀོ་འཇིག་རྟེན་རྒྱན། །


གྲོགས་དག་མནོག་ཆུང་ཚེ་འདིའི་དོན་ཙམ་དུ། །
རྟེན་བཟང་ནོར་བུ་ཆུད་གཟོན་མ་མཛད་པར། །
གཏན་གྱི་འདུན་མ་བསྒྲུབ་ཕྱིར་རྣམ་དཀར་ལ། །
རླབས་ཆེན་བརྩོན་འགྲུས་རྩོམས་ཤིག་སྙིང་གཏམ་ཡིན། །

རྣམ་དག་ཚུལ་ཁྲིམས་མེད་པར་བཟླས་བསྒོམ་སོགས། །
ཡུན་རིང་དགེ་ལ་འབད་ལོ་བརྒྱ་བྱས་ཀྱང་། །
མངོན་མཐོ་ཙམ་ཡང་འགྲུབ་པར་དཀའ་བས་ན། །
སྲོག་བཞིན་ཚུལ་ཁྲིམས་སྲུངས་ཤིག་སྙིང་གཏམ་ཡིན། །

རྐྱེན་ངན་འཛིང་བའི་དུས་འདིར་ཆོས་བྱེད་རྣམས། །
གཉོམ་ཆུང་ཞི་དུལ་དམན་ས་ཆེར་བཟུང་ནས། །
དྲན་ཤེས་བག་ཡོད་ཤིན་ཏུ་མ་བསྟེན་ན། །
ཆོས་མགོ་ཐོན་པར་དཀའོ་སྙིང་གཏམ་ཡིན། །

སྒོ་གསུམ་སྡིག་ལྟུང་དཀོར་སྒྲིབ་སྣ་ཚོགས་ཀྱིས། །
ཡང་ཡང་སྦགས་པར་ཡར་སྐྱེད་འོང་དཀའ་བས། །
སྟོབས་བཞི་ཚང་བའི་བཤགས་སྡོམ་བཟླས་བརྗོད་ལ། །
རྒྱུན་དུ་བརྩོན་པ་སྐྱེད་ཅིག་སྙིང་གཏམ་ཡིན། །

འཇམ་མགོན་རྒྱལ་བའི་བསྟན་དང་མཇལ་དུས་འདིར། །
རྒྱུད་ཀྱི་རྒྱལ་བོ་བདེ་གསང་འཇིགས་གསུམ་གྱི། །
ཆོ་ག་བསྙེན་བསྒྲུབ་རིམ་གཉིས་རྣལ་འབྱོར་ལ། །
བག་ཆགས་བཟང་པོ་ཐོབས་ཤིག་སྙིང་གཏམ་ཡིན། །

འབད་པའི་དགེ་ཚོགས་བླ་མེད་རྫོགས་བྱང་དུ། །
ལེགས་པར་བསྔོས་ན་དགེ་རྩ་ཆུང་ངུ་ཡང་། །
འབྲས་བུ་མཐའ་མེད་ཉིད་དུ་འཕེལ་བའི་ཕྱིར། །
བསྔོ་སྨོན་ཤུགས་དྲག་གྱིས་ཤིག་སྙིང་གཏམ་ཡིན། །

བདག་ལ་དད་ལྡན་ཁྱིམ་པ་ཕོ་མོ་རྣམས། །
བསྙེན་གནས་བསྲུང་ཞིང་རྒྱུན་དུ་མ་ཎི་སྒྲོངས། །
ནམ་ཞིག་འཆི་ཚེ་རྟ་ནོར་ཁྲི་ཕྲག་ལས། །
མ་ཎི་པད་རྡོག་གཅིག་མཁོ་སྙིང་གཏམ་ཡིན། །

ཚེ་འདིའི་ལྟོ་རྒྱབ་བུ་དང་ཆུང་མའི་ཕྱིར། །
རྐུ་འཕྲོག་ཁྲམ་རྫུན་རི་དྭགས་རྔོན་པ་སོགས། །
སྡིག་ལ་ཤིན་ཏུ་དཔའ་བའི་ཕོ་རྒོད་ཚོ། །
འཆི་ཁར་ལྟད་ད་དོ་སྙིང་གཏམ་ཡིན། །

དྲག་ཞན་སྐྱ་སེར་ཕོ་མོ་མཐའ་དག་གིས། །
ལས་འབྲས་དྲང་བོར་བསྲུངས་ཏེ་དགེ་བའི་ལམ། །
དང་དུ་བླང་ན་འདི་ཕྱི་ཐམས་ཅད་དུ། །
བདེ་སྐྱིད་རྒྱུན་མི་འཆད་དོ་སྙིང་གཏམ་ཡིན། །

གང་གིས་གང་ལ་སྙིང་གཏམ་སྨྲ་བ་དཀོན། །
དེ་བས་དེ་ལ་ཉན་པ་ཤིན་ཏུ་དཀོན། །
བདག་གི་ཕན་པའི་སེམས་ཀྱི་སྙིང་གཏམ་འདི། །
སྙིང་གི་ཟེའུ་འབྲུར་ཆོངས་ཤིག་ཤེས་ལྡན་ཚོགས། །

འདིར་འབད་དགེ་ཚོགས་སྟོན་ཀའི་ཟླ་འོད་ཀྱི། །
མཛེས་པ་ལན་བརྒྱར་འཐུངས་པའི་རྗེས་འགྲོ་གང་། །
སྲིད་ཞིའི་རྣམ་དཀར་ཉལ་འགྲོའི་རྒྱུན་བཟང་དང་། །
ལྷན་ཅིག་ཀུན་མཁྱེན་རྒྱ་མཚོར་འཇུག་པར་ཤོག། །།
ཅེས་པ་འདི་ནི་ཆོས་སྨྲ་བ་ཤིང་བཟའ་དབྱངས་ཅན་དགྱེས་བློས་སྦྱར་བའོ།། མངྒ་ལམ།།
ངེད་དྲ་ཚིགས།

དཔྱད་མཆན་སྤེལ།

%d bloggers like this: