འོད་དཀར་དྲ་ཚིགས།

༡༽  ཁྲོ་ཕུའི་སྐུ་འབུམ་ཆེན་མོ།

      ཁྲོ་ཕུའི་སྐུ་འབུམ་ཆེན་མོ་ནི་བོད་ལྗོངས་གཞིས་ཁ་རྩེ་ས་སྐྱ་རྫོང་གི་ཁྲོ་ཕུ་དགོན་པ་དང་ཉེ་བའི་ལུང་མདའི་ཕྱོགས་སུ་དུས་རབས་བཅུ་གསུམ་པའི་ནང་ཙམ་དུ་ཁྲོ་ཕུ་ལོ་ཙཱ་བ་བྱམས་པའི་དཔལ་དང་། སྲས་སེམས་དཔའ་ཆེན་པོ་བསོད་ནམས་སེང་གེ་གཉིས་ཀྱིས་བཞེངས་ཤིང་།ཕྱིས་ཉམའ་རྒུད་དུ་སོང་ཡང་ད་ལྟ་ལྷོ་གྲོ་བོ་ལུང་གི་བླ་མ་ཉི་མས་བཟོ་བཀོད་ཕུན་སུམ་ཚོགས་པར་བསྐྱར་བཞེངས་གནང་ཡོད།

༢༽  ཇོ་ནང་སྐུ་འབུམ་མཐོང་གྲོ་ཆེན་མོ།

     ཇོ་ནང་སྐུ་འབུམ་མཐོང་གྲོ་ཆེན་མོ་ནི་བོད་ལྗོངས་གཞིས་ཁ་རྩེ་རྫོང་ཕུན་ཚོགས་གླིང་གི་ཕུ་ཇོ་མོ་ནང་གི་གདན་སར་ཀུན་མཁྱེན་དོལ་པོ་བ་ཤེས་རབ་རྒྱལ་མཚན་གྱིས་རབ་བྱུང་དྲུག་པའི་ལྕགས་རྟ་སྤྱི་ལོ 1330 ལོར་བཞེངས། ཁོང་གིས་མཛད་པའི་རྒྱལ་བའི་མཆོད་རྟེན་དཔལ་ཡོན་ཅན་གྱི་བཞེངས་ཚུལ་ལ་བསྟོད་པ་འཁོར་བ་དུང་སྤྲུག་ཅེས་པ་ལས། སངས་རྒྱས་རིང་བསྲེལ་མང་པོའི་སྙིང་པོ་ཅན། མཆོད་རྟེན་གཅིག་ལ་ལྷ་ཁང་བརྒྱ་རྩ་བརྒྱད། ལྷ་ཁང་རྣམས་ཀྱི་ཕུག་ན་དབུ་རྩེ་ཅན། མདོ་རྒྱུད་བསྟན་བཅོས་མན་ངག་མང་པོ་ལས། ཇི་ལྟར་འབྱུང་ཚད་དང་ལྡན་པར་བཞེངས། ཞེས་ལྷ་ཁང་བརྒྱ་རྩ་བརྒྱད་ཀྱིས་གྲུབ་པར་གསུངས།

༣༽   གཅུང་རི་བོ་ཆེའི་སྐུ་འབུམ་ཆེན་མོ།

    གཅུང་རི་བོ་ཆེའི་སྐུ་འབུམ་ཆེན་མོ་ནི་བོད་ལྗོངས་གཞིས་ཁ་རྩེ་ངམ་རིངརྫོང་གི་གྲུབ་ཆེན་ཐང་སྟོང་རྒྱལ་པོས་ཕྱག་བཏབ་པའི་གཅུང་རི་བོ་ཆེའི་དགོན་པའི་འཁྲིས་སུ་ཡོད། འདི་གྲུབ་ཆེན་རང་ཉིད་ཀྱིས་མཆོད་རྟེན་ཆེ་ཆུང་བརྒྱ་ལྷག་བཞེངས་པའི་གྲས་སུ་ཚོད་དཔག་ཙམ་ལས་སུས་བཞེངས་གསལ་ཐག་ཆོད་པ་མི་སྣང་བ་འདྲའོ། གྲུབ་ཆེན་གྱིས་བཞེངས་པར་ཆ་བཞག་ན་དུས་རབས་བཅོ་ལྔ་པའི་ནང་ཙམ་དུ་བྱུང་ཞེས་བཤད་ཆོག

༤༽  རྒྱལ་རྩེའི་དཔལ་འཁོར་མཆོད་རྟེན་ནམ་སྐུ་འབུམ་བཀྲ་ཤིས་སྒོ་མང་ཞེས་པ།

     རྒྱལ་རྩེའི་དཔལ་འཁོར་མཆོད་རྟེན་ནམ་སྐུ་འབུམ་བཀྲ་ཤིས་སྒོ་མང་ཞེས་པ་ནི་ཕག་གྲུ་སྡེ་སྲིད་སྐབས་ཀྱི་བློན་ཆོས་རྒྱལ་རབ་བརྟན་ཀུན་བཟང་འཕགས་ཀྱིས་རབ་བྱུང་བདུན་པའི་མེ་རྟ་སྤྱི་ལོ1427ལོར་བཞེངས། འདིའི་མཐོ་ཚད་ལ་སྨིས་བཞི་བཅུ་ལྷག་དང་། རྨང་གཞི་རྒྱ་ཁྱོན་ལ་སྨིས་གྲུ་བཞི་མ་ཉིས་སྟོང་ཉིས་བརྒྱ་ཙམ་དང་། ལྷ་ཁང་བརྒྱ་དང་བརྒྱད་ཡོད་བཤད། འདིར་བཤད་པའི་སྐུ་འབུམ་རྣམ་བཞི་ཞེས་པ་བརྗོད་བདེ་བའི་ཆེད་ཙམ་དུ་སྦྱར་བ་ལས་སྔོན་ཆད་ནས་གྲགས་པའི་ཐ་སྙད་མ་ཡིན་པས་ད་དུང་མཆོད་རྟེན་འདིའི་རིགས་ཡོད་མེད་དང་། ཡང་ན་བོད་ཡུལ་གྱི་སྐུ་འབུམ་འདི་འདྲའི་རིགས་ཕྱོགས་བསྡུས་ཀྱིས་བཤད་ན་ལོ་རྒྱུས་ལ་མིག་རྒྱ་ཡངས་པར་འགྱུར་རོ། ཁམས་སྲས་ཀྱིས་བྲིས།

གཞན་ལས་བཤུས།