ཐོ་ཡོར།༼དཀར་མཛེས།༽ ལས་དབང་ལྟར་སྨོན་ལམ་བརྒྱབ་པ། ཕན་ཚུན་འཕྲད་དེ་ཡིད་འོང་ཆུ་ཕྲན་མིག་གི་མཐའ་ནས་འཕྱུར།། ཆུ་བོ་རབ་མེད་གླིང་བུའི་བུ་གར་ལོ་མའི་བྱེའུ་འཕུར་བ་ཡང་།། ཅི་ཕྱིར་དེང་ནས་བཟུང་སྟེ་ཡིད་ཙམ་མ་འགོར་རྡོ་ལ་ཐོགས།། དེའི་ཚེ་ཆུ་ནང་ཞུགས་པའི་འགྲོ་བས་བདག་ལ་ཚིག་ལན་བྱུང་།། ཤིན་ཏུ་དྭངས་བའི་ཆུ་ནང་ཟླ་འོད་དང་འགྲོགས་ནས།། གྲང་བའི་ཉམ་ཐག་པདྨ་རླབས་ཀྱི་བརྩེ་བས་གསལ་བར་བྱས། དེ་ནས་ཇ་སྐོལ་མེ་འབུད་ཡིད་མཐུན་སྒུག་པའི་ལོང་མ་བྱུང་།། ལམ་འཛོལ་བྱུང་ལྟར་བྲང་ཁའི་སྙིང་ཆུང་ལིང་ལིང་འདར་བ་མཐོང་།། འཁོར་བའི་རྒྱ་མཚོས་སྣུབ་པའི་མི་དག་རྗེས་སུ་འཛིན་པའང་མཐོང་།། དེ་ལྟར་ནམ་ཡང་ལྷན་ཅིག་སྐྱོ་བའི་ཤུགས་ཀྱིས་འགྲོགས་པར་ཤོག། དེ་ལྟར་ནམ་ཡང་གདུང་བའི་རྒྱུན་དང་ལྷན་ཅིག་བདེ་བར་ཤོག། 2016.7.15.ཉིན་སྲང་ལམ་ཞིག་ནས་ཙོག་པུར་བསྡད་དེ་བྲིས། སེམས་གཏམ། སྲིད་པའི་སྐྱོ་གར་ཧ་ཅང་དགོད་རེ་བྲོ།། ལས་ལ་བསྐོས་པའི་མི་དག་རྒྱང་དུ་འགྲོ། ལན་རེར་ཆ་རྒྱུས་མེད་པའི་མི་ཡི་སར།། དགའ་སྡུག་སྣང་བ་ཆུ་བཞིན་ལྷུང་ལྷུང་འབབ།། ལན་བུའི་མདངས་ལ་སྲོད་ཁའི་མཚམས་སྤྲིན་ངུ།། སྨུག་པ་ཡང་ནི་སྨྲེང་བའི་ལམ་ནས་རྒས།། ཁྱོད་ཀྱིས་ཕལ་བའི་གོས་ཀྱིས་མེ་ཏོག་གཙགས།། ངོས་ཀྱིས་ཕལ་བའི་མིག་གིས་ཁྱེད་རང་མཐོང་།། རྐང་སྣམ་སྔོན་པོ་འདབས་ཁ་ཅུང་ཙམ་རྫེ།། དཀར་འཇམ་ཉྭ་ལ་བསིལ་རླུང་རན་ཙམ་ལྡང་།། སྟོད་ལྭ་ནག་པོ་དེ་ཡང་ཡི་གར་འོང་།། གདུང་བའི་ཉིན་སྲིབ་གཉིས་ཀྱི་མུན་པ་སེལ།། ཚི་ལེན་སྐྱ་བོར་དྲན་པའི་ན་བུན་འཁྲི།། ངོས་ནི་ཁྱེད་ཀྱི་ཟུར་ན་སྙིང་ཆུང་ལྡིང་།། ངག་འཇམ་བསིལ་བའི་སྒྲ་ལ་སེམས་ཀྱིས་ཉན།། མིག་གིས་ཕུར་ཚུགས་ཞལ་ལ་ལྟ་མི་ཕོད།། ཡིད་འོང་གཞིས་འདི་ལོགས་སུ་བསྐྱུར་མི་ཕོད།། གཞིས་འདིས་ཁྱོད་དང་འཕྲད་པའི་དུས་ཚོད་རུམ།། ཉི་མ་ལ་མོ་བརྒལ་ཡང་སྣང་བ་དྲོ།།...