__ཨ དོན་ཉི། ༼ཨ་རི།༽           ཉེ་ལམ་བོད་ཀྱི་རྩོམ་མཁན་ཚེ་རིང་དོན་གྲུབ་ལགས་ལི་ཡུལ་དུ་བསྐྱོད་པའི་ཟིན་རྩོམ་ཞིག་བཀླགས་ཤིང་། ཁོང་གིས་ཟིན་ཐོ་དེའི་ནང་བྲིས་པའི་མི་རིགས་གཞན་པའི་རིག་གནས་ཀྱི་རྐང་མང་བོ་ཞིག་ཡུ་གུར་མི་རིགས་ཀྱི་ཡི་གེར་བསྒྱུར་ཡོད་པའི་སྐོར་དེས། བདག་ཡིད་རབ་ཏུ་བཀུག་ཅིང་ཤིན་ཏུ་སྡུག་པར་བཏང་སོང་།          ངའི་ཡིད་སེམས་བཀུག་དོན་ནི། ཡུ་གུར་མི་རིགས་ཀྱི་བློ་གྲོས་ཅན་རྣམ་པས་ལེ་ལོ་དང་རྣམ་གཡེང་ལ་མ་བསྐུར་བར་མི་རིགས་གཞན་གྱི་རིག་གནས་ཀྱི་ལེགས་ཆ་མང་བོ་ཞིག་ཁོང་ཚོའི་རིག་གནས་སྐད་ཡིག་ལ་བསྒྱུར་ཡོད་པའི་ཤེས་རབ་མུ་བསྲིངས་ཀྱི་འོད་ཟེར་ཞིག་སྤྲོས་འདུག་པ་དེས་ཡིན།           སེམས་སྡུག་པར་བཏང་དོན་ནི། མི་རབས་གསར་བའི་ང་ཚོ་བོད་ཀྱི་ཤེས་ཡོན་པའི་སྡེ་ན། སྟོབས་ལྡན་མི་རིགས་གཞན་པའི་ཤེས་རབ་ལས་འཁྲུངས་པའི་རིག་གནས་ཀྱི་སྙིང་བཅུད་འཛོམས་པོ་དག་ཚུར་བོད་བསྒྱུར་བྱ་མཁན་གྱི་མི་བུ་དཔྱོད་ལྡན་པ་ཉུང་དྲག་འདུག་སྙམ་པའི་ཀུན་སློང་སྐྱོ་མོ་དེ་འདྲ་བས་བསྐྱེད་པ་ཡིན།         དེང་གི་མི་རབས་གསར་བའི་བོད་ཀྱི་རིག་གནས་པ་དང་སློབ་སྦྱོང་ཅན་གྱི་སྡེ་བ་ན། མི་རིགས་གཞན་པའི་རིག་གནས་སྣང་ཚུལ་གྱི་དར་རྒྱས་ཆེན་པོའི་འཕུར་སྐྱོད་ལ་ཡ་མཚར་གྱི་བསམ་བློ་འཆིང་སྟེ་འགྲམ་ཆུ་སྐམ་པོ་ལྡང་བར་དགའ་བའི་རིགས་མང་བ་ལས། བློ་དང་རིག་པས་བདར་ཞིང་ཚེགས་དང་བརྩོན་འགྲུས་བརྒྱབ་ནས་མི་རིགས་གཞན་པའི་རིག་གནས་ཀྱི་མཚར་སྡུག་ནང་འདྲེན་བྱེད་ཐུབ་མཁན་གྱི་མི་བུ་ཧ་ཅང་གི་ཉུང་ཉུང་རེད།  དེ་བས་ཀྱང་བདག་བློས་འཇུན་མི་ནུས་པ་ཞིག་ནི། ཆབ་དཔལ་རིག་གསུམ་གྱི་ཡང་རྩེར་སོན་པའི་རྒྱལ་ཁོངས་མང་བོ་ན་འཚོ་བ་སྐྱེལ་བཞིན་པའི་བོད་ཀྱི་ཤེས་ཡོན་པ་ཕལ་མོ་ཆེ་རྣམས། མི་རིགས་གཞན་པའི་ཧུར་བསྐྱེད་བསམ་བློའི་རིག་གནས་ཀྱི་མཁའ་དབུགས་ལ་བློ་སྦྱོང་ཙམ་དང་བག་ཆགས་ཙམ་བཞག་པས་ཆོག་བློ་སྐྱེ་སྟེ། མི་རིགས་གཞན་པའི་དཔེ་ཀློག་གི་སྐོམ་གདུང་དང་ཞིབ་འཇུག་གི་སྤོབས་པ། འབད་འབུངས་ཀྱི་ལག་ལེན་དང་གསར་གཏོད་ཀྱི་ཤེས་རབ་སོགས་ཀྱི་རིག་གནས་ལེགས་ཆ་མང་བོ་ཞིག། ཚུར་བོད་ཀྱི་རིག་གནས་བང་མཛོད་ནང་ལ་ཁུ་བསྡུ་དང་འབོར་འདྲེན་བྱེད་མི་བཏུབ་པའི་བསམ་བློའི་སྒྱིད་ལུག་པ་མང་བ་དེ་རེད།          མ་ཟད་ཡང་། ཡར་རྒྱས་ཀྱི་མགྱོགས་ཚད་བྱ་ལྟར་མྱུར་བའི་ཕྱིའི་རྒྱལ་ཁབ་དག་གི་བོད་ཀྱི་རྩོམ་པ་པོའི་དཔུང་སྡེ་ན། བོད་རང་གི་སྲོལ་རྒྱུན་རིག་གནས་རྐྱང་བས་གྲོད་ཁོག་འགྲང་ཐག་ཆོད་དེ། མི་རིགས་གཞན་པའི་རིག་གནས་ཀྱི་འཕུར་སྐྱོད་བྱེད་སར་ཁོ་ཚོ་རྐང་པ་དང་ལྟོ་བས་འཕྱེ་ནས་འགྲོ་བར་གོམས་ཡོད་པ་ལས། ཁོ་རང་ཚོའི་མིག་གིས་མཐོང་ཞིང་ལག་པས་སྙོབ་སའི་མི་རིགས་གཞན་གྱི་རིག་གནས་གསར་བསྒྱུར་གྱི་གཡོ་ཁྱོམ་ལ་ཁ་ཡ་བྱེད་ཀྱི་མེད་ཚོད་རེད།       ཅི་ཞིག་རྩོམ་མཁན་དུ་ཁས་འཆེས་པ་དང་རིག་པ་སྨྲ་བའི་ཚུགས་ཀ་འདོན་མཁན་གྱི་མི་བུ་མང་ཚོད་ཅིག་ལ་ལས་ཀ་གཞན་ཞིག་ཡོད་པ་ནི། ནམ་ནམ་ཞར་ཞར་དུ། བོད་ཀྱི་གཞོན་སྐྱེས་ཚོའི་བསམ་བློ་གསར་བའི་མགོ་གང་ནས་འབུས་ན་དེ་ལ་རྒྱུགས་ནས་འབུར་འཇོམས་དང་དཀྲུགས་གཏམ་སྨྲ་བར་ལོབས་འདུག་པ་ལས།...

ཁ་སྒང་གཡང་འབུམ་ཚེ་རིང་། ཀ་ར་བུ་རམ་ལྟ་བུའི།། ཁ་ཞེ་མཐུན་པའི་སྙིང་གཏམ།། ག་ལེར་ཞུ་བར་འདོད་ན།། ང་ལ་ལན་གཅིག་གསན་རོགས། ཅ་ཅོ་ཀུ་ཅོ་མ་འདོན།། ཆ་ལུགས་གཞན་དུ་མ་སྒྱུར།། ཇ་ཁང་ཆང་ཁང་མ་ཉུལ།། ཉ་རེ་ཉོ་རེར་མ་འདུག། ཏ་ལའི་བླ་མའི་དགོངས་པ།། ཐ་མལ་ང་ཚོས་མ་དཀྲུག། ད་ལྟའི་རང་རེའི་བདེ་སྡུག། ན་མཉམ་ང་ཚོས་སྒྲུབ་དགོས།། པ་ཕ་ཨ་མའི་ཐུགས་རེ།། ཕ་གཞིས་གྲོང་ན་འཁྱིལ་བ།། བ་གླང་རྫི་བོ་ཡིན་ཡང་།། མ་བཤད་ན་འང་ལོས་ཤེས།། ཙ་གེ་ཙི་གེ་དོན་དུ།། ཚ་གེ་ཚི་གེ་མ་བྱེད།། ཛ་དྲག་གནད་འགག་གང་ཡིན།། ཝ་ལེར་རྟོག་པ་གལ་ཆེ།། ཞ་ར་འཐེང་པོ་མིན་ན།། ཟ་འཐུང་གཅིག་པོས་མི་ཆོག། འ་ཅག་མི་རིགས་ལས་དོན།། ཡ་ཁོག་སྙིང་ལ་བཅང་དགོས།། ར་བ་གངས་རིའི་ཡུལ་ལ།། ལ་མོར་ལོག་འདོད་ཡོད་ན།། ཤ་ཞེན་བློ་སྤོབས་ཆེན་པོས།། ས་ཆེན་ཁ་ལོ་སྒྱུར་དགོས།། ཧ་ཅང་ཐལ་བའི་གཏམ་འདི།། ཨ་གསར་རྟ་ཕོར་བསྐྱོན་ནས།། ཧ་བེ་ཧོ་བེར་ལུད་པ།། ཨ་ཕོ་ང་ཡི་ཁ་སྤོབས།། ༢༠༡༥/༡༢/༠༧...