བོད་གངས་རིའི་ལྗོངས་ཀྱི་ཁོར་ཡུག་སྲུང་སྐྱོབ་བྱ་བ་གལ་ཆེ་བའི་བསམ་ཚུལ་ཕྲན་བུ། རྩོམ་པ་པོ། རིག་པའི་ཁུ་བྱུག       བོད་གངས་རིའི་ལྗོངས་ཀྱི་ཁོར་ཡུག་སྲུང་སྐྱོབ་བྱ་དགོས་པའི་གལ་ཆེ་ཚུལ་གྱི་སྐོར་ནས་རང་གི་བསམ་ཚུལ་མདོར་བསྡུས་ཙམ་ཞུ་ན། དེ་ཡང་གངས་ཅན་ལྗོངས་ནི་འཛམ་གླིང་གི་ཡང་རྩེར་གྱུར་པ་སྟེ།       རིན་སྤུངས་པ་ངག་དབང་འཇིག་རྟེན་དབང་ཕྱུག་གྲགས་པས། ནོར་འཛིན་མ་འདིའི་རྒྱན་དུ་སྲིད་པ་ཡིས། ། བྱིན་པའི་གངས་རི་དཔལ་གྱི་དོ་ཤལ་ཅན། ། ལྟོ་བར་ཆོས་ཀྱི་རྒྱལ་སྲིད་བླ་ན་མེད། ། 
གླིང་རྣམས་ཀུན་གྱི་གཙུག་ཏོར་འདི་ཡིན་ནོ། །           ཞེས་གསུངས་པ་ལྟར་གྱི་བསིལ་ལྡན་ཁ་བ་ཅན་ནི། གངས་རི་ར་བས་བསྐོར་ཞིང་། མཚོ་དང་མཚེའུས་བརྒྱན་པ། ཆུ་དང་གཙང་བོས་ཕྱུག་པ། ནགས་དང་སྤང་གིས་ཡོངས་སུ་སྤྲས་པའི་ཡུལ་ལྗོངས་འདི་ནི།
　འཕགས་མཆོག་སྤྱན་རས་གཟིགས་ཀྱིས་བྱིན་གྱིས་བརླབས་པའི་གནས་དང་། སློབ་དཔོན་པདྨ་འབྱུང་གནས་ཀྱི་ཞབས་ཀྱིས་བཅགས་པའི་གནས་དང་། རྗེ་བཙུན་འཕགས་མ་སྒྲོལ་མ་དངོས་སུ་བཞུགས་ཤིང་རྗེས་སུ་བཟུང་བ་སོགས་ཀྱི་གནས་དང་། མ་ཎི་ཡིག་དྲུག་དང་གུ་རུ་སིདྔྷིའི་ཆོས་སྒྲ་ནི་སྐྱེ་བོ་རྒན་གཞོན་དང་། མི་སྐྱ་ཕོ་མོ། བན་ཇོ་སེར་སོགས་ཀྱི་ཁྱད་པར་གང་ཡང་མེད་པར་ཀུན་གྱི་ངག་ནས་དབྱར་དགུན་སྟོན་དཔྱིད་སོགས་དུས་བཞི་དབྱེར་མེད་ལ་མཐོན་པོའི་རྫ་རྩེ་ནས་དམའ་མོའི་སྤང་གཞུང་གི་བར་དུ་དབྱངས་ལ་དྲངས་ནས་མགུར་དུ་སྒྲོག་པའི་ཕན་ཡོན་དང་དགེ་བས་ཁྱབ་པའི་བསིལ་ལྡན་ལྗོངས་ཞེས་པའི་ཆོས་ལྡན་གྱི་ཞིང་ཁམས་སུ། ①ཞེས་པ་ལྟར། བོད་གངས་ཅན་ལྗོངས་ཀྱི་རྒྱ་ཁྱོན་ཡོངས་ལ་སྤྱི་ལེ་ངོས་སྙོམས་གྲུ་བཞི་མ་ཁྲི 250ལྷག་ཡོད་པ་དང་། རྒྱ་མཚོའི་ངོས་ལས་ཆ་སྙོམས་མཐོ་ཚད་ལ་རྨིས 4500ཡན་ཡོད་ཅིང་།...