འཇུ་སྐལ་བཟང་།
ཁོ་ཚོས་ཡིག་ནོར་བྲིས་བཞག
ཡིག་ནོར་འདི་ཚོ ང་ཚོའི་མུན་པ་རེད འུག་པ་རེད
ཁྭ་ཏ་བཞིན་ཨག་སྐད་འཛེར་འཛེར་འབྱིན་གྱིན་འདུག
སྡིག་སྲིན་བཞིན་ཡན་ལག་ཤིགས་ཤིགས་འགུལ་གྱིན་འདུག
གོས་སྲུབས་སུ་འཚང་བའི་སོ་མ་བཞིན་བསལ་དུ་མེད་པར་འདུག
དེ་ཚོས་ང་ཚོར་སྐྱི་གཡའ་རུ་འཇུག་བཞིན ཞེ་མེར་དུ་འཇུག་བཞིན
ཟུག་རྔུ་བསྐྱེད་བཞིན དངངས་སྐྲག་སློང་བཞིན་འདུག
ཡིག་ནོར་ཚོས་གཞུང་ལུགས་ན་གཡེང་རྐྱལ་བྱེད་ཀྱིན་འདུག
བསླབ་བྱ་ན་གཡོ་སྟོན་བྱེད་བཞིན་འདུག
རྩོམ་རིག་ན་བཅོས་འཛུམ་སྟོན་བཞིན་འདུག
ལོ་རྒྱུས་ཀྱི་འགག་མདོ་ན་རྩོད་གཞི་སློང་གིན་འདུག་ཅིང
མཚམས་ཁང་གི་སྒོ་དྲུང་ནས་ལོག་སྟོན་བྱེད་ཀྱིན་འདུག
ཐ་ན་སྨན་རྐྱལ་དུ་འཛུལ་ནས
ཤི་གསོན་གྱི་གྱེས་སོ་ན་བརྡ་ལོག་རྒྱག་གིན་འདུག
མདོར་ན་ཡིག་ནོར་དེ་ཚོས་ཆོས་ལོག་འཆད་ཀྱིན་འདུག
སྲིད་ནོར་དུའང་འཁྲིད་ཀྱིན་
འདུག་སྟེ་ཁོ་ཚོས་ག་སར་ཡིག་ནོར་བྲིས་བཞག
གཞུང་ཡིག་ན་ཡིག་ནོར་བྲིས་བཞག
ཐམ་ག་ན་ཡིག་ནོར་བྲིས་བཞག
སྒོ་བྱང་ན་ཡིག་ནོར་བྲིས་བཞག
ཡིག་ནོར་གྱི་སྙན་ཞུ་ལ
ཡིག་ནོར་གྱི་ཆོག་མཆན་འགོད་ཅིང་།
ཡིག་ནོར་གྱིས་ལག་བསྟར་བྱེད་ཀྱིན་འདུག
ད་ལྟ་དེ་ཚོ་ཡམས་ནད་བཞིན་ག་སར་ཁྱབ་ཟིན
ནམ་མཁའ་ནས་འབབ་ཀྱིན་འདུག
གྲོང་མཐའ་ན་ཉུལ་གྱིན་འདུག
ལྷས་འདབས་སུ་རུལ་བཞིན་འདུག
ང་ཚོས་ཁ་ནས་ཡིག་ནོར་ཟོས་ཟིན
ང་ཚོའི་རྒྱབ་ཏུ་ཡིག་ནོར་གྱོན་ཟིན
ད་ལྟ་ང་ཚོ
ཡིག་ནོར་དང་ཁ་འབྲལ་ཐབས་མེད་པར་གྱུར་འདུག
ཁོ་ཚོས་ག་སར་ཡིག་ནོར་བྲིས་བཞག
ང་ཚོའི་གཙང་བོ་དང་ལོ་རྒྱུས་ཀྱི་མགོ་ཁུངས་ནས ཡིག་ནོར་གྱིས་རྙོག་གིན་འདུག
མཐོ་སྒང་གི་རུས་སྒྲོམ་ཧྲིལ་བོ་ཡིག་ནོར་གྱིས་ཟ་གིན་འདུག
ཡིག་ནོར་ཚོ་མའི་མངལ་དུ་ཞུགས་ཟིན་པས
རིགས་རྒྱུད་ཀྱི་ཕྱི་མ་ཚོ་རྙོག་འཐོམ་མེར་བཏང་འདུག
ཁོ་ཚོས་ག་སར་ཡིག་ནོར་བྲིས་བཞག
ཨ་ཁ་ཁ ཁོ་ཚོས་ངའི་ཆེས་གཅེས་ཐང་ཆེ་བའི་རུས་མིང་དེ
ཡིག་ནོར་གྱིས་བྲིས་བཞག
ངའི་དུར་བྱང་ལ་ཡིག་ནོར་བཏབ་བཞག
ངེད་དྲ་ཚིགས།
