ཐེངས་ཤིག་ཨ་ཁུ་སྟོན་པ་ཞོགས་པ་སྔ་པོ་ནས་གཙང་པོའི་ཕ་རོལ་ཏུ་བསྐྱོད་དགོས་པར་བརྟེན། གཙང་པོའི་འགྲམ་དུ་བསྐྱོད་ནས་གྲུ་གཏོང་མཁན་ལ་གྲུ་དེ་གཏོང་རོགས་ལབ་པས། གྲུ་གཏོང་མཁན་དེས་ “ཁྱེད་རང་ལ་གྲུ་གླ་སྤྲོད་རྒྱུ་ཨེ་ཡོད།” ཅེས་དྲིས་པས་ཨ་ཁུ་སྟོན་པས། “ཡོས་ཡོད་” ཅེས་ལབ་པས་གྲུ་པ་དེས་ལམ་སེང་གྲུ་བཏང་བ་དང་། ཆུའི་ཕ་རོལ་ཏུ་སླེབས་ཁར་ཨ་ཁུ་སྟོན་པས་རང་ཉིད་ལ་ཡོད་པའི་ཡོས་དེ་ནས་གྲུ་གཏོང་མཁན་དེར་སྦར་མོ་འགའ་ཤས་སྤྲད། གྲུ་པ་དེས་ཀྱང་ཡོས་རྣམས་བཟས། དེ་ནས་ཨ་ཁུ་སྟོན་པ་གཙང་པོའི་ཕ་རོལ་དུ་སླེབས་ རྗེས་གྲུ་པ་དེས། “ད་གྲུ་གླ་ཁྱེར་ཤོག” ལབ་པས་ཨ་ཁུ་སྟོན་པས། “གྲུ་གླ་གང་འདྲ་ཞིག་ཕུལ་དགོས་རེད་དམ། ད་གིན་དངུལ་ཡོད་མེད་བཀའ་དྲི་གནང་བྱུང་བས་ངས་ཡོས་ཡོད་ཞུས་པ་ལས་དངུལ་ཡོད་ཞུས་མེད། འོན་ཀྱང་ཁྱེད་ཀྱིས་གྲུ་བཏང་བྱུང་བས་ངའི་སེམས་པར་གྲུ་གླ་ཡོས་སྤྲད་ན་འགྲིག་ གི་ཡོད་པ་འདྲ་བསམས་བྱུང་། ཡོས་ནི་ཕུལ་ཟིན་པ་ཡིན། ད་ང་ལ་གང་ཡང་ཕུལ་རྒྱུ་མེད་”ལབ་པར། གྲུ་གཏོང་མཁན་དེ་གང་ཡང་ལམ་རྒྱུ་མ་རག་པོར་ལུས་སོ།
ཕ་བོང་སྤོས་པ།
ཨ་ཁུ་སྟོན་པ་གྲུ་ཁ་དེ་ནས་ཐོན་པ་ནས་སང་ཉིན་ཞོགས་པ་བར་ལྟོ་ཆས་ཟ་རྒྱུ་མ་རག་པར་ལུས་ཏེ་གྲོད་པ་ལྟོགས་བསྡད་ཡོད་པའི་སྐབས་དེར། ཞིང་པ་ཞིག་ཉིན་དགུང་གི་ཁ་ལག་ཟ་བཞིན་ཡོད་པ་མཐོང་། ཁོང་ཚོའི་ཞིང་ཁའི་དཀྱིལ་དེར་རྡོ་ཕ་བོང་ཆེན་པོ་ཞིག་ཡོད་པ་དེར་ཨ་ཁུ་སྟོན་པས་ལྟ་ཙམ་བྱས་ནས། རང་ཉིད་ཤུགས་ཆེན་པོ་ཡོད་ཁུལ་གྱིས། “ཞིང་པ་ཚོ། ཁྱེད་ཚོས་ཕ་བོང་ཆེན་པོ་འདི་ཕྱིར་མ་བཏོན་པ་ཅི་ཡིན། གལ་ཏེ་ཕ་བོང་འདི་ཕྱི་རུ་བཏོན་པ་ཡིན་ན་ཞིང་ཁར་ལོ་ཏོག་སྐྱེ་ཚད་མང་དུ་འགྲོ་བཟོ་འདུག” ཅེས་ལབ་པས། ཞིང་པ་རྒན་པ་ཞིག་ཡར་ ལངས་ཏེ། “ཁོང་ང་ཚོས་ཕ་བོང་འདི་ཕྱི་ལ་སྤོ་དགོས་བསམས་རུང་རྩ་བ་ནས་སྤོ་ཐུབ་ཀྱི་མི་འདུག” ཟེར་བར། ཨ་ཁུ་སྟོན་པས་ཕ་བོང་དེར་ལྟ་ཙམ་ཞིག་བྱས་ནས། “འདི་སྤོ་རྒྱུ་ལས་སླ་པོ་རེད། ངས་ཁུར་ནས་སྤོས་ཆོག་ཀྱང་ད་ལྟ་ང་གྲོད་པ་སྟོང་པ་ཡིན་” ལབ་པར། ཞིང་པ་ཚོས་ “འོ་ན་སྔོན་ལ་ཞལ་ལག་མཆོད་ཟེར་ནས་ཨ་ཁུ་སྟོན་པར་ལྟོ་ཆས་རྒྱགས་ཚད་སྤྲད། དེ་རྗེས་ཨ་ཁུ་སྟོན་པས་ཐག་པ་རིང་པོ་ཞིག་ཁྱེར་ནས། ཡ་་་་ད་འདི་ངའི་སྒལ་པར་སྐུར་ཤོག” ལབ། འོན་ཀྱང་ཚང་མས་སྐུར་ཐུབ་རྒྱུ་ལྟ་ཞོག་འགུལ་ཙམ་ཡང་བྱེད་མ་ཐུབ་པར་ལུས་པས། ཨ་ཁུས་འུད་ཤོབ་དང་བཅས། “ཁྱེད་རང་ཚོ་མི་མང་པོ་འདི་ཙམ་གྱིས་སྐུར་མ་ཐུབ་ན་ང་ལ་ཐབས་ཤེས་མི་འདུག ཡང་མིན་ན་ཁྱོད་ཚོས་ཁུར་ཐུབ་པ་འདུག་གམ། ངས་བསྐུར་ཆོག” ཅེས་ལབ་པར་ཁོ་ཚོ་ཚང་མ་ཁ་ཁུ་སིམ་མེར་བསྡད། དེ་ནས་ཨ་ཁུས་ “ད་ནི་ཐབས་ཤེས་རྫོགས་སོང་། ངས་ད་གིན་ཁྱེད་ཚོར་སྤོས་ཆོག་ལབ་པ་ཡིན། འོན་ཀྱང་ཁྱོད་ཚོས་སྐུར་མ་ཐུབ་ན་ང་ལ་ཐབས་ཤེས་མེད” ཟེར་ནས་ལོག་ཕྱིན་པར། ཁོ་ཚོ་གང་ཡང་ལབ་རྒྱུ་མ་རག་པར་ལུས་སོ།
ཡོང་ཁུངས་གཞན། ཡི་གེ་བ་གྲུ་ལྷོ་སྐལ་བཟང་ཕུན་ཚོགས།
